Bıyl brakonerler memleketke 13 mlrd teńge shyǵyn keltirdi
Jyl basynan beri elimizde qorshaǵan ortany qorǵaý salasynda 300 myńnan astam quqyq buzýshylyq tirkeldi. Bul týraly ІІM ÁPK tabıǵatty qorǵaý polıtsııasy tobynyń erekshe tapsyrmalar jónindegi aǵa ınspektory Álisher Jarmaǵambetov málim etti, dep habarlaıdy Kazinform.
«Osy jyldyń 20 qazanynan 19 qarashasyna deıin Іshki ister mınıstrligi "Brakoner" jedel aldyn alý is-sharasyn ótkizedi. Onyń maqsaty janýarlar dúnıesi, balyq jáne orman sharýashylyǵy obektilerin, jer qoınaýyn zańsyz óndirý faktileriniń aldyn alý jáne anyqtaý. Іs-shara bastalǵannan beri 61 qylmystyq jáne 2 myńnan astam ákimshilik quqyq buzýshylyq anyqtaldy», - dedi ol ІІM baspasóz qyzmeti alańynda ótken brıfıngte.
Sonymen qatar ІІM ókili ańshylardyń qarý-jaraqqa salǵyrt qaraý jáne ań aýlaý erejelerin buzý saldarynan jaraqat alyp qalatyn jaǵdaılar da bolyp turatyndyǵyna nazar aýdartty.
«Osyǵan baılanysty Іshki ister mınıstrligi azamattardy tabıǵatty qorǵaý zańnamasyn saqtaýǵa, tabıǵatqa uqypty qaraýǵa, belgilengen ań aýlaý erejeleri men qarýdy qaýipsiz paıdalaný erejelerin buzbaýǵa shaqyrady», - dedi Álisher Jarmaǵambetov.
