Bıyl bızneske nesıe berýde eleýli ózgeris boldy - Premer-mınıstrdiń orynbasary
ASTANA. KAZINFORM – Osy jylǵy bes aıda korporatıvtik sektorǵa jańa berilgen kredıtter kólemi 14,8%-ǵa ósti. Bul týraly Memlekettik aktıvterdi basqarý kompanııalarynyń halyqaralyq forýmynyń (IPAF) 10-shy sammıtinde Premer-mınıstrdiń orynbasary — Ulttyq ekonomıka mınıstri Serik Jumanǵarın málim etti.
- Memlekettik kompanııalardyń basshylary úshin negizgi tıimdilik kórsetkishteri (KPI) túbegeıli qaıta qaraldy. Onda bıýdjetke jáne Ulttyq qorǵa qaıtarylǵan qarajat kólemi, ońaltylǵan kásiporyndardyń sany, tartylǵan jeke ınvestıtsııalar kólemi jáne eńbek ujymdaryn saqtap qalý kórsetkishteri eskerildi. Problemalyq aktıvter júktemesin azaıtý bızneske kredıt berýge tikeleı serpin beredi. 2026 jyldyń alǵashqy 5 aıynda korporatıvtik sektorǵa jańa berilgen kredıtter kólemi 14,8%-ǵa ósip, 8,9 trln teńgege jetti, al bıznestiń jıyntyq portfeli 19 trln teńgeden asty. Memlekettik «Órleý» sııaqty baǵdarlamalardyń qoldaýymen óńdeý ónerkásibi men metallýrgııa salalarynda aıtarlyqtaı ósim baıqaldy, - dedi S. Jumanǵarın.
Buǵan deıin habarlanǵandaı, Premer-mınıstrdiń orynbasary Qazaqstan halyqaralyq qarjy ınstıtýttarymen yntymaqtastyqtyń berik júıesin qalyptastyrǵanyn atap ótti.
Aıta keteıik, is-sharany QR Qarjy mınıstrligi, «Problemalyq kredıtter qory» AQ jáne Azııa damý banki birlesip uıymdastyryp otyr. Bul sammıtke 19 elden 200-ge jýyq ókil jáne 60-qa jýyq uıym qatysyp jatyr. IPAF – Azııa óńirindegi problemalyq aktıvterdi basqarý salasyndaǵy memlekettik uıymdardy biriktiretin jetekshi halyqaralyq alań. Sammıttiń Qazaqstanda ótkizilýi elimizdiń qarjy sektoryn saýyqtyrý jáne stresstik aktıvterdi tıimdi basqarý baǵytyndaǵy tájirıbesin halyqaralyq deńgeıde tanytýǵa múmkindik beredi.
