Bıyl bızneske qysym jasamastan 4 trln teńge salyq túsirý kerek – Serik Jumanǵarın
ASTANA. KAZINFORM - Vıtse-premer – ulttyq ekonomıka mınıstri Serik Jumanǵarın QR Qarjy mınıstrliginiń keńeıtilgen alqasyna qatysty.
Vıtse-premer vedomstvonyń memlekettik qarjynyń turaqtylyǵyn qamtamasyz etýge qosqan úlesin atap ótip, qyzmetkerlerdiń jas býyny eldiń bıýdjet júıesin tıimdi basqarý jumysyn laıyqty jalǵastyryp kele jatqanyn atap kórsetti.
Onyń aıtýynsha, Úkimettiń ekonomıkalyq blogynyń aldynda aýqymdy mindetter tur. Ony júzege asyrý kóbinese Qarjy mınıstrliginiń júıeli ári maqsatty jumysyna baılanysty.
-Ótken jyly memlekettik qarjyny shoǵyrlandyrýǵa arnalǵan bıýdjet-salyq reformasy júrgizildi. Búginde ony júzege asyrýda Qarjy mınıstrligi sheshýshi ról atqarady. Memlekettiń áleýmettik baǵdaryn saqtaı otyryp, biz bıýdjet shyǵystaryn qatań tekserip otyrýymyz qajet, — dedi Serik Jumanǵarın.
2026 jylǵy basymdyqtyń biri – tıimsiz shyǵystardy anyqtap, bıýdjettik baǵdarlamalardy ońtaılandyrý maqsatynda jan-jaqty qaıta qaraý.
Salyqtyq ákimshilendirýge erekshe kóńil bólinedi. Bıyl 4 trln teńgeden asa salyq túsirý mindeti qoıyldy. Bul rette ákimshilendirý tsıfrlyq quraldarǵa negizdelip, ádil bolyp qalýy jáne bızneske artyq qysym jasamaýy tıis.
Vıtse-premer qarjy blogynyń tsıfrlyq transformatsııasy júıelik sıpat alǵanyn atap ótti. Smart Data Finance taldamalyq bazasy qurylyp, salyq tóleýshilerdiń qyzmetin qadaǵalaý júıesi engizildi. Bul rette barlyq tsıfrlyq sheshim úzdiksiz jumys isteýi tıis. Sebebi salyqtyq basqarýdyń jańa modeli tsıfrlyq qyzmettiń sapasyna tikeleı baılanysty.
Sondaı-aq, alqa barysynda bıznesti jańa Salyq kodeksine birtindep beıimdeý úshin «Taza paraq» bir rettik aktsııasy júzege asyrylyp, Salyq kodeksiniń jańa normalaryn ımplementatsııalaý máselesi Jobalyq keńse sheńberinde apta saıyn talqylanatyny atap ótildi.
Mıkro jáne shaǵyn bıznes 2026 jylǵy 1 sáýirge deıin negizgi boryshyn ótegen jaǵdaıda, ósimpul men aıyppuldy eseptemeı, jeńildetilgen joıý rásimin paıdalana alady. QQS boıynsha esepke ýaqtyly qoıylmaǵany úshin salynatyn aıyppul da joıylady.
Salyq qatynastaryn qaıta iske qosý sheńberinde:
- 2025 jylǵy 17 jeltoqsanǵa deıin usynylǵan esep berý boıynsha, 2026 jylǵy 1 qańtarǵa deıingi kezeńdegi mindettemege kameraldyq baqylaý toqtatyldy;
- 2026 jylǵy 1 qańtarǵa deıin salyq kezeńderi boıynsha salyqtyq tekserýler men ákimshilik jazalar toqtatyldy;
- 2026 jylǵy 1 qańtarǵa deıin jasalǵan mámileler men tirkeýlerdi jaramsyz dep taný týraly talap qoıý toqtatyldy.
Bul sharalar salyq tóleý eriktiligin arttyryp, memleket pen bıznestiń jańa ózara is-qımyly modelin qalyptastyrýǵa arnalǵan.
2026 jyly salyq júıesin tsıfrlandyrý jalǵasady. Ońaılatylǵan deklaratsııany avtomattandyrý, salyq eseptiligi nysandaryn aldyn ala toltyrý, salyq tóleýshiler úshin JI-servıs engizý, Memlekettik kirister komıtetiniń derekqoryn basqa vedomstvolarmen ıntegratsııalaý josparlanǵan. Zańdy tulǵalar úshin tólemderdi avtomatty túrde esepten shyǵaratyn «Salyq ámııany» tetigi engiziledi.
«Tsıfrlyq QQS» jobasy sheńberinde negizgi aqparattyq júıelerdi ıntegratsııalaý jalǵasady. Memlekettik satyp alý salasynda tsıfrlyq teńge qoldanylatyn pılottyq jobany iske qosý josparlanyp otyr.
Qazirgi ýaqytta memlekettik kirister organdary 42 qyzmet túrin kórsetedi. Onyń 39-y (92%) elektrondyq formatqa aýystyryldy. 13 qyzmet tolyq avtomattandyrylǵan, 37-sine eGov.kz portalynda qol jetkiziledi. Bıznesti proaktıvti súıemeldeý servıstik modeline kóshý jumysy jalǵasady.
Osyǵan deıin 2026 jyly bankter Qarjy mınıstrliginiń qundy qaǵazdarynan túsken kiristen salyq tóleı bastaıtyny týraly jazdyq.