Bıyl bıdaı alqaby qysqaryp, maıly daqyldar ulǵaıtylady

ASTANA. KAZINFORM – Bıyl bıdaı alqaby 187 myń gektarǵa qysqartylady. Bul týraly Aýyl sharýashylyǵy vıtse-mınıstri Erbol Tasjúrekov aıtty.

- Ákimdikterdiń derekteri boıynsha aǵymdaǵy jyly aýyl sharýashylyǵy daqyldaryn 23,7 mln gektar jerge ornalastyrý josparlanýda. Bul 2024 jylǵy kórsetkishten 413 myń gektarǵa artyq.

Dándi jáne dándi-burshaqty daqyldardyń egis alqaptary 115 myń gektarǵa qysqaryp, 16,6 mln gektardy quraıdy. Bıdaı alqaby ótken jylmen salystyrǵanda 187 myń gektarǵa qysqaryp, 13,0 mln gektarǵa ornalasady. Maıly daqyldar alqaby 378 myń gektarǵa ulǵaıyp, 3,3 mln gektar bolady. Onyń ishinde kúnbaǵys alqaby 1,4 mln gektarǵa jetkiziledi, - dedi ol Ortalyq kommýnıkatsııalar qyzmetindegi brıfınge.

Onyń dereginshe, uıymdasqan sharýashylyqtarda kartop alqaby 11,3 myń gektarǵa artyp, 83,4 myń gektarǵa jetedi.

- Azyqtyq daqyldarynyń alańyn 127 myń gektarǵa ulǵaıtý jáne olardy 3,3 mln gektarǵa deıin jetkizý josparlanýda. Jalpy, dándi, maıly, kókónis-baqsha daqyldary, kartop boıynsha josparlanǵan alańdar ishki naryqtyń qajettilikterin tolyq qamtamasyz etýge múmkindik beredi, - dedi Erbol Tasjúrekov.

Buǵan deıin elimiz byltyr 16 mln tonnadan astam aýyl sharýashylyǵy ónimderin eksporttaǵanyn jazǵan edik.