Bıyl Beıneý-Sekseýil jolynyń qurylysy bastalady

ASTANA. KAZINFORM — Bıyl Transkaspıı halyqaralyq kólik baǵytyn shamamen 1 000 shaqyrymǵa qysqartatyn Beıneý-Sekseýil jolynyń qurylysy bastalady. Bul týraly Úkimet otyrysynda Kólik mınıstri Nurlan Saýranbaev aıtty.

— Respýblıkalyq joldardyń eki róli bar. Birinshi — óńirler arasynda baılanys jasaý. Ekinshi — halyqaralyq tranzıtti damytý. Búgingi kezde Qazaqstanda 7 avtokólik dálizi qalyptasty. Atap ótetin bolsaq, ótken jyldary 4 úlken jobany aıaqtadyq: «Qalbataý-Maıqapshaǵaı», «Taldyqorǵan-Óskemen», «Atyraý-Astrahan» jáne «Qaraǵandy-Almaty». Bul joldardyń jalpy uzyndyǵy — 2 000 shaqyrym. Kólik qozǵalysy ósip jatyr jáne keıbir dálizder úlken júktemede jumys isteıdi. Sondyqtan, aldymyzda jańa kóp jobalar bar, — dedi Nurlan Saýranbaev.

Onyń aıtýynsha, júktelgen tapsyrmalarǵa sáıkes Jańaózen-Túrikmenstan shekarasy ýchaskesinde jumystar júrgizilip jatyr.

— Bul ýchaske Túrikmenstan-Reseı dáliziniń bir bóligi. Sonymen qatar joldy 4 jolaqqa deıin keńeıtý boıynsha tehnıkalyq-ekonomıkalyq negizdeme ázirleý bastaldy. Qazirgi ýchaskede jasalynyp jatqan jumystardy bıyl bitiremiz. Kelesi joba Beıneý-Sekseýil. Bul joba Transkaspıı halyqaralyq kólik baǵyty boıynsha joldy shamamen 1000 shaqyrymǵa jáne júk jetkizý ýaqytyn 3 kúnge deıin qysqartady. Jobanyń tehnıkalyq-ekonomıkalyq negizdemesi ázirlengen. Qazirgi ýaqytta qarjy tartý rásimderi júrgizilýde. Qurylys jumystaryn bıyl bastaımyz, — dedi mınıstr.

Aıta keteıik, Úkimet avtojol salasyn damytý máselesin pysyqtap jatyr.