Bıyl bes sý qoımasynda keń aýqymdy batımetrııalyq túsirilim jasaldy
ASTANA. KAZINFORM — «Qazsýshar» RMK-nyń «Sý-metrologııa» fılıaly bıyl Shardara sý qoımasynda 18 myń gektardan astam aýmaqta batımetrııalyq, sondaı-aq 72 myń gektardan astam aýmaqta topografııalyq túsirilim jumystaryn aıaqtady. Bul týraly vedomstvonyń baspasóz qyzmeti málim etti.
Qazirgi ýaqytta dalalyq zertteý nátıjeleri óńdelip, qorytyndy esep ázirlenip jatyr. 2025-2029 jyldarǵa arnalǵan «Batımetrııa salasyndaǵy sý sharýashylyǵy júıesin damytý jónindegi keshendi sharalar» jol kartasyn iske asyrý aıasynda fılıal bıyl Batys Qazaqstan oblysyndaǵy Bitik, Dóńgelek, Kırov jáne Saryshyǵanaq sý qoımalarynda da batımetrııalyq túsirilimder júrgizdi. Qazirgi kezde Kırov sý qoımasynda topografııalyq túsirilim jumystary aıaqtalýǵa jaqyn.
– Budan bólek, bıyl Esil ózeniniń 1800 shaqyrymynda, Jaıyq ózeniniń 1300 shaqyrymynda jáne Soltústik Qazaqstan oblysyndaǵy Sergeev sý qoımasynda batımetrııalyq zertteý jumystary oryndaldy. Al kelesi jyly «Sý-metrologııa» fılıaly Túrkistan oblysyndaǵy on sý qoımasynda batımetrııalyq jáne topografııalyq túsirilim júrgizýdi josparlap otyr, – dedi Sý resýrstary jáne ırrıgatsııa mınıstrligi Tsıfrlandyrý departamentiniń dırektory Meıirgúl Qýandyqova.
Al memleket ózenderdi tartylýdan qalaı qorǵaıtynyn myna siltemeden oqyńyz.