Bıyl «Báıterek» holdıngi arqyly ShOB-ty qoldaý kólemi shamamen eki trln teńgege jetti

ASTANA. KAZINFORM — Memleket basshysy Qasym-Jomart Toqaev «Altyn sapa» jáne «Paryz» syılyǵynyń laýreattaryn marapattaý rásiminde «Damý» qory janynan shaǵyn jáne orta bızneske, sondaı-aq iri ınvestıtsııalyq jobalarǵa arnalǵan eki kepildik qory qurylǵanyn eske saldy.

Prezıdent bıznesti memlekettik qoldaý sharalarynyń tıimdiligin arttyrý mańyzdy ekenin basa aıtty.

— Eksport naryǵynda básekege túse alatyn, otandyq shıkizatty paıdalanatyn, sondaı-aq ozyq tehnologııalar men ınnovatsııalar transferimen aınalysatyn kásiporyndarǵa basymdyq berilýge tıis. Bıyl «Báıterek» holdıngi arqyly shaǵyn jáne orta bıznesti qoldaý kólemi shamamen eki trıllıon teńgege jetti. Tikeleı sýbsıdııalaýdan góri kepildik berý quraldaryna kóshtik. Osy maqsatta meniń tapsyrmammen «Damý» qory janynan shaǵyn jáne orta bızneske, sondaı-aq iri ınvestıtsııalyq jobalarǵa arnalǵan eki kepildik qory quryldy. Atalǵan baǵyt aıasynda 2229 jobaǵa jalpy somasy 400 mıllıard teńgeden astam kredıt berildi. Onyń ishinde 220 mıllıard teńgeden astamy memlekettik kepildikpen qamtamasyz etildi, — dedi Toqaev.

Budan buryn Prezıdent Toqaev shıkizattyq emes eksport kólemi 2 esege jýyq ulǵaıǵanyn aıtty.

Sonymen qatar Memleket basshysy ınflıatsııany turaqtandyrýdy Úkimettiń ózekti mindeti retinde atady.

Toqaev elimizdiń ishki jalpy ónimi alǵash ret 300 mıllıard dollardan asatynyn alǵa tartty.