Bıyl Baıanaýylǵa 300 myń týrıst keledi dep kútilýde
ASTANA. KAZINFORM – Bıyl Pavlodar oblysyndaǵy Baıanaýyl kýrorttyq aımaǵyna keletin týrıster sany 300 myń adamǵa deıin jetedi dep kútilip otyr. Bul týraly Pavlodar oblysy ákimdiginiń baspasóz qyzmeti habarlady.
Ákimdiktiń málimetinshe, búginde Baıanaýyl sońǵy jyldardaǵy týrıstik ınfraqurylymdy jańǵyrtýdyń eń aýqymdy kezeńderiniń birin bastan ótkerip jatyr.
Sabyndykól men Jasybaı kólderiniń jaǵalaýy keshendi túrde abattandyrylyp, zamanaýı jaǵajaılar, jańa qoǵamdyq keńistikter men qyzmet kórsetý nysandary salynyp jatyr. Sabyndykól jaǵasynda uzyndyǵy bir shaqyrym bolatyn serýendeý aımaǵy boı kóterse, Jasybaı kóliniń ortalyq jaǵajaıy sport jáne balalar alańdarymen, demalys aımaqtarymen, sanıtarlyq modýldermen jáne fýd-korttarmen jabdyqtalǵan.
– Júrgizilip jatqan júıeli jumystardyń nátıjesinde 2025 jyldyń qorytyndysy boıynsha Baıanaýyl kýrorttyq aımaǵyna 270 myń týrıst keldi. Іshki týrızm kórsetkishi 27 paıyzǵa, al kelý týrızmi 25 paıyzǵa artty. Bıyl týrıster sany 300 myń adamǵa deıin jetedi dep kútilýde, – delingen ákimdik habarlamasynda.
Sondaı-aq jumys kúniniń qorytyndysy Sabyndykól jaǵasynda ótken Bayanaul FEST festıvalimen túıindeldi. Festıval aıasynda sporttyq jarystar, otbasylyq baıqaýlar uıymdastyrylyp, kontserttik baǵdarlama usynyldy.
Bas sahnada Jubanysh Jeksenuly, KeshYou toby, Nurbolat Abdýllın jáne Kalifarniya óner kórsetti.
Aıta keteıik, Baıanaýylda bıyl týrıstik ınfraqurylymdy damytýǵa baǵyttalǵan birqatar joba júzege asyrylyp, olardyń qatarynda «Saryarqa syry» zamanaýı vızıt-ortalyǵy da bar.
