Bıyl barlyq aýyldyq okrýg ákimniń tsıfrlyq jumys orny modýline qosylady
ASTANA. KAZINFORM — 2026 jyldyń birinshi jartyjyldyǵynda barlyq aýyldyq okrýg ákimniń tsıfrlyq jumys orny modýline kezeń-kezeńimen qosylady. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
— Aýyldyq deńgeıde josparlaý men resýrstardy nysanaly bólý sapasyn arttyrý maqsatynda memlekettik basqarýdy tsıfrlandyrý quraldary engizilip jatyr. Atap aıtqanda, «Ákimniń tsıfrlyq jumys orny» jobasy aýyldyq okrýg ákimderin jergilikti jerde jaǵdaıdy keshendi taldaýǵa jáne jedel basqarýshylyq sheshim qabyldaýǵa arnalǵan birińǵaı tsıfrlyq terezemen qamtamasyz etýge baǵyttalǵan. Joba aıasynda Tsıfrlyq otbasy kartasy bazasynda ákimniń tsıfrlyq jumys ornynyń jeke modýli ázirlenip, eldiń 17 óńiri boıynsha 34 aýyldyq okrýgte pılottyq rejımde iske qosyldy. Alǵashqy nátıjeler aýyl deńgeıindegi basqarýshylyq protsesterdi tsıfrlandyrý ákimshilik júktemeni tómendetýge, eseptilikti avtomattandyrýǵa, memlekettik qoldaý sharalarynyń nysanaly bolýyn arttyrýǵa, sondaı-aq sheshim qabyldaýda derekterge negizdelgen tásilge kóshýge múmkindik beretinin kórsetti, — dedi Oljas Bektenov.
Onyń aıtýynsha, jobanyń mańyzdy artyqshylyǵy — ıntegratsııalardyń tereńdigi. Modýl 30-dan astam memlekettik aqparattyq júıedegi derekterdi qamtıdy. Osy arqyly ákimder vedomstvolarǵa kóp márte suraý salmaı-aq ózekti ári dáıekti aqparat biryńǵaı kózine qol jetkizedi.
Qazirgi ýaqytta modýlde aýyldyq aýmaqtyń negizgi áleýmettik-demografııalyq jáne ekonomıkalyq kórsetkishteri, sondaı-aq ár otbasy jáne ár adam boıynsha tizimdik tirkelim qoljetimdi. Budan ári júıeni jer, kólik jáne múlik salyqtary, sýbsıdııalar, áskerı mindettiler, ShQ/FQ kepilderi jáne keńeıtilgen áleýmettik mártebeler boıynsha derektermen tolyqtyrý josparlanǵan. Bul aýyldyq aýmaqty basqarýdyń monıtorıngten strategııalyq josparlaýǵa deıingi tuıyq tsıfrlyq kontýryn qalyptastyrýǵa múmkindik beredi. 2026 jyldyń birinshi jartyjyldyǵynda barlyq aýyldyq okrýgterdi kezeń-kezeńimen qosý josparlanǵan, — dedi Premer-mınıstr.
Oljas Bektenov pılot aıasynda paıdalanýshylardyń eseptik jazbalaryn ashý boıynsha jıyntyq kórsetkish 1 821 birlikti quraǵanyn aıtady.
— Byltyr barlyq óńir men aýdandar (oblystyq mańyzy bar qalalar) jańartylǵan memlekettik josparlaý júıesi talaptaryn eskere otyryp, 2026–2030 jyldarǵa arnalǵan jańa damý josparlaryn ázirledi jáne olardy máslıhattar bekitti, — dedi ol.
Buǵan deıin Úkimet basshysy memlekettik aqparattyq júıelerge qol jetkizýdi qamtamasyz etý úshin biryńǵaı «Ákimniń tsıfrlyq jumys ornyn» engizý jumystary júrgizilip jatqanyn aıtqan edi.