Bıyl bankter bıýdjetke qosymsha 0,5 trln teńge salyq tóleıdi
ASTANA. KAZINFORM – Ulttyq bank tóraǵasy Tımýr Súleımenov Úkimettiń keńeıtilgen otyrysynda bankterdiń korporatıvtik tabys salyǵy kóteriletinin aıtty.
- Sizdiń tapsyrmańyz boıynsha qarjy sektorynyń baǵytyn ózgertip jatyrmyz. Osylaısha bankterdiń resýrstary naqty sektordy qarjylandyrýǵa baǵyttaımyz. Kredıt naryǵyndaǵy eki negizgi segmentti salystyrsaq, byltyr naqty ekonomıkanyń kredıtteri kepilsiz tutyný kredıtterinen jyldam ósti. Bıyl fıskaldyq sharalar da kúshine enedi. Bankterge salynatyn korporatıvtik tabys salyǵy kóteriledi. Memlekettik baǵaly qaǵazdarǵa salyq salynady. Bankterdiń memlekettik baǵaly qaǵazdardan túsetin tabysyna bir rettik salyq engiziledi, - dedi ol.
Aıtýynsha, bul sharalar bıýdjetke jarty trıllıon teńgeden astam qarajat túsiredi.
- Sáýir aıyna deıin bankter jeke tulǵalarǵa berilgen kredıtter boıynsha 500 mlrd teńgege jýyq qosymsha kapıtal qalyptastyrady. Bankter úshin rezervtik talaptardy birtindep arttyra beremiz. Bul 3,9 trln teńge artyq ótimdilik naryqtan alyp, ınflıatsııalyq qysymdy azaıtady.
Sizdiń tapsyrmańyz boıynsha, bankterge memleket tarapynan berilgen kómekti merziminen buryn qaıtarý jumysy jalǵasýda. Búginde 738 mlrd teńgeni merziminen buryn qaıtaryp berdi. Osy jumys bıyl da jalǵasady, - dedi Tımýr Súleımenov.
Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.
Jıynda eldiń 2025 jylǵy áleýmettik-ekonomıkalyq damýy qorytyndylanyp, Úkimettiń aldaǵy kezeńge arnalǵan negizgi mindetteri aıqyndalady.