Bıyl balyq sharýashylyǵyn damytý úshin 400-den astam sý aıdyny bekitiledi
ASTANA. KAZINFORM – Bıyl balyq sharýashylyǵyn damytý úshin 400-den astam sý aıdyny bekitiledi. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Balyq sharýashylyǵyn turaqty damytý, memlekettik retteý tetikterin jetildirý jáne balyq ónimderi aınalymyn baqylaýdy kúsheıtý maqsatynda Úkimet júıeli sharalar keshenin iske asyryp jatyr. «Janýarlar dúnıesin qorǵaý, ósimin molaıtý jáne paıdalaný týraly» Zańǵa sáıkes, balyq sharýashylyǵy sý aıdyndary men ýchaskelerin bekitý basseındik qaǵıdat eskerile otyryp, konkýrstyq negizde júzege asyrylady, - dedi Úkimet basshysy.
Premer-mınıstr dereginshe, búginde halyqaralyq jáne respýblıkalyq mańyzy bar 20 sý aıdyny bar. Olar 368 ýchaskege bólingen. Onyń ishinde 270 ýchaske 127 paıdalanýshyǵa bekitilgen. 98 ýchaske áli bekitilmegen kúıinde qalyp otyr.
- 2025 jyly akvasharýashylyq pen agroónerkásiptik keshendi retteýdi jetildirýge baǵyttalǵan Zań qabyldandy. Ony damytý aıasynda balyq sharýashylyǵy sý aıdyndaryn bekitý boıynsha konkýrstar ótkizýdiń jańartylǵan qaǵıdalary bekitildi. Osylaısha, bıyl balyq sharýashylyǵyn jáne akvasharýashylyqty damytý úshin 400-den astam sý aıdyny men ýchaskeni bekitý josparlanǵan. Qazirgi ýaqytta konkýrstyq rásimder bastalyp ketti, - dedi Oljas Bektenov.
Buǵan deıin elimizde balyq sharýashylyǵyn memlekettik qoldaýdyń keshendi sharalary iske qosylǵanyn jazǵan edik.
