Bıyl balalarǵa arnalǵan 42 myń kitap jaryq kóredi

ASTANA.KAZINFORM — 2 sáýir dúnıejúzi boıynsha Halyqaralyq balalar kitaby kúni atalyp ótedi.

Aıtýly kún jas urpaqtyń kitap oqýǵa degen qyzyǵýshylyǵyn arttyryp, olardyń rýhanı damýynyń mańyzdylyǵyn aıqyndaıdy. Búginde Qazaqstanda 3889 kópshilikke qoljetimdi kitaphana jumys isteıdi, onyń ishinde 272-si — balalar kitaphanasy. Olardyń kitap qory 7 mıllıonnan astam danany quraıdy, al oqyrmandar sany 1,7 mıllıonnan asa balany qamtıdy.

Eń kóp suranysqa ıe shyǵarmalardyń qatarynda Berdibek Soqpaqbaevtyń «Meniń atym Qoja» jáne «Balalyq shaqqa saıahat», Saıyn Muratbekovtyń «Jabaıy alma» jáne «Jýsan ıisi», sondaı-aq Antýan de Sent-Ekzıýperıdiń «Kishkentaı hanzada» eńbekteri bar.

Mádenıet jáne aqparat mınıstrligi jyl saıyn maqsatty aýdıtorııaǵa arnalǵan kitaptardy shyǵaryp, olardy el kitaphanalaryna taratady. 2020–2025 jyldary 396 myń dana taralymmen 132 kitap jaryq kórdi.

2026 jyly balalar men jasóspirimderge arnalǵan 42 myń dana kitap shyǵaryp, kitaphanalarǵa jetkizý josparlanyp otyr. Ádebıettiń qoljetimdiligin arttyrý maqsatynda elektrondy nusqalary Qazaqstan ulttyq elektrondyq kitaphanasynyń portalynda ornalastyrylady.

Balalar ádebıeti salasynyń damýyna ádebı syılyqtar men baıqaýlar da aıtarlyqtaı úles qosýda. Atap aıtqanda, «Aıboz» ulttyq syılyǵy jáne Prezıdenttik ádebı syılyq aıasynda balalar ádebıeti boıynsha nomınatsııalar qarastyrylǵan. Elimizde 2025 jyldan bastap Ulttyq kitap kúni atalyp ótedi. Onyń aıasynda balalar basylymdaryna arnalǵan arnaıy sanattardy qamtı otyryp, «Ulttyq kitap» baıqaýy ótkiziledi.

Aıta ketelik Almatyda Álıhan Bókeıhanovtyń 160 jyldyǵyna arnalǵan jańa kitaptyń tusaýkeseri ótti.