Birneshe óńirde asyrandy balalardy uryp-soǵý men azaptaý faktileri tirkelgen

ASTANA. KAZINFORM – Prokýrorlar júrgizgen tekseris nátıjesinde Astana, Almaty, Shymkent qalalarynda, Almaty jáne Túrkistan oblystarynda bala tárbıesine jaýapty mamandar arasynda júkteme shamadan tys kóp ekeni anyqtalǵan. Bul týraly prokýratýranyń baspasóz qyzmeti málim etti. 

«Tekserý búginde bir qyzmetkerge túsetin júkteme 17 myń balaǵa jetetinin, al Astana, Almaty, Shymkent qalalarynda, Almaty jáne Túrkistan oblystarynda 30-dan 100 myńǵa deıin jetetinin kórsetti. Álemdik standarttarǵa sáıkes 1 qyzmetkerge júkteme normasy 5 myń baladan, al eń progressıvti elderde 1 myńnan aspaýy kerek», — delingen habarlamada.

Prokýratýranyń málimetinshe, saladaǵy qyzmetkerlerdiń moınyna shamadan tys júkteme ilingendikten, olar kámeletke tolmaǵandardy tárbıeleý jáne baǵý jaǵdaılaryn baqylap úlgermeıdi. Kesirinen, balalarǵa qatysty zorlyq-zombylyq jaǵdaılary kóbinese kesh anyqtalady.

«Jyl basynan beri asyrap alynǵan balalardy uryp-soǵý jáne azaptaý faktileri Shymkent qalasynda, Ulytaý jáne Aqmola oblystarynda tirkelgen. Máselen, Aqmola oblysynda sáýir aıynda patronat tárbıeshiniń 5 balany uryp-soǵý faktileri anyqtalǵan. Tergep-tekserý barysynda úsh jyldan astam ýaqyt buryn bir balany óltirý faktisi anyqtalǵan. Ulytaý oblysynda balalardy fermada jumys isteýge májbúr etken asyrap alǵan ana 4 jylǵa bas bostandyǵynan aıyryldy», — dep habarlady prokýratýradan.

Osy turǵyda Bas prokýratýra Bala quqyqtary jónindegi ýákildiń qorǵanshylyq jáne qamqorshylyq organdary qyzmetkerleriniń sanynyń normatıvtik zańnamalyq turǵydan bekitýge qatysty bastamasyn qoldaıdy. Sonymen qatar Mınıstrlik prokýratýranyń pedagog-psıhologtardyń qyzmetin kúsheıtý qajettiligine qatysty usynystaryn qoldady.

Atap aıtqanda, pedagog-psıhologtardyń sany boıynsha normatıv zańnamalyq turǵydan qaıta qaralýda, munda 1 mamanǵa júkteme 500 oqýshydan aspaýy tıis. Jalpy, Jol kartasy Mınıstrliktiń basqa da baǵyttary boıynsha jumystarynyń tıimdiligin arttyrady dep kútilip otyr. 

Jyl sońyna deıin devıantty minez-qulqy bar balalardyń «jaǵymdy ortaǵa» beıimdeý boıynsha jobany iske asyrý (bedeldi tálimgerlerdi bekitý, kadet synyptaryna jáne «Jas sarbaz» áskerı-patrıottyq qozǵalys klýbtaryna, Ulttyq ulannyń «Jas búrkit» jáne t. b. ornalastyrý), ishki ister organdarynyń esebinde turǵan kámeletke tolmaǵandardy qosymsha bilimmen jáne t. b. qamtý maqsatynda olarǵa tekserý júrgizý josparlanǵan. Tekserý nátıjeleri boıynsha buzýshylyqtarǵa jol bergen kináli laýazymdy tulǵalar, onyń ishinde Mınıstrliktiń bólimshe basshylary tártiptik jaýapkershilikke tartyldy. 

Eske sala keteıik, buǵan deıin ІІM balalardy jynystyq quldyqqa salýdyń 13 faktisi tirkelgenin jarııalaǵanyn jazǵan bolatynbyz.

Sondaı-aq jaqynda balalar ombýdsmeni Dınara Zákıeva Qazaqstanda qorǵanshylyq qyzmetkerleriniń sany artyp, jalaqysy kóteriletinin aıtqan edi.