Bıyl balalar men jasóspirimder qozǵalysyn damytýdyń jańa tásilderi qabyldanady

ASTANA. KAZINFORM – Balalar men jasóspirimder qozǵalysyn damytýǵa arnalǵan kontseptýaldyq tásilder jobasy ázirlenip jatyr. Bul týraly Májilis depýtattarynyń saýalyna Premer-Mınıstrdiń orynbasary Ermek Kósherbaevtyń jaýabynda aıtylǵan.

- Balalar men jasóspirimder qoǵamdyq qozǵalysy 3,5 mıllıonnan astam balany qamtıdy. Onyń ishinde 415,9 myń bala oqýshylardyń ózin-ózi basqarý organdaryna (mektep parlamentteri) tartylǵan. Bul qozǵalys oqýshylar arasynda quqyqtyq saýattylyqty qalyptastyrýǵa yqpal etedi jáne 9 negizgi baǵytty (ıntellektýaldyq, patrıottyq, quqyqtyq, ekologııalyq, sporttyq-saýyqtyrý, mádenıet jáne óner, ǵylymıtehnıkalyq, aqparattyq, eriktilik) qamtıdy, - dedi Ermek Kósherbaev jaýabynda.

Vıtse-premerdiń atap ótýinshe, elimizde Balalar men jasóspirimder qozǵalysyn damytý jónindegi respýblıkalyq úılestirý keńesi quryldy. Jyl saıyn balalar qozǵalysyna qatysýshylar qatary 100-150 myń oqýshymen (2023 jyl – 2,8 mln, 2024 jyl - 2,9 mln, 2025 jyl – 3,0 mln) tolyqtyrylady.

- Qazirgi ýaqytta Oqý-aǵartý mınıstrligi balalar men jasóspirimder qozǵalysyn damytýǵa arnalǵan kontseptýaldyq tásilderdiń jobasyn ázirleýde. Ol osy jyldyń sońyna deıin bekitiledi, - dedi Úkimet basshysynyń orynbasary.

Aıta keteıik, «Jas Ulan» qozǵalysy 1,5 mln balany, shyǵarmashyl jastardyń ekologııalyq qozǵalysy «Jer elshileri» - 23 myń oqýshyny biriktiredi. Respýblıkalyq «Jas sarbaz», «Jas búrkit», «Jas qutqarýshy» qozǵalystarynda 170 myńnan astam, debattyq qozǵalysta 194 084 bala bar.

Buǵan deıin balalardyń quqyǵyn qorǵaıtyn bólek basqarma qurylǵanyn jazǵan edik.