Bıyl balabaqshalar vaýcherlik qarjylandyrý júıesine ótedi
ASTANA. KAZINFORM – Jyl basynan balabaqshalardy vaýcherlik qarjylandyrý pılottyq jobasy elimizdiń 20 qalasy men 7 aýdanynda sátti iske asyryldy. Bul týraly Oqý-aǵartý mınıstri Ǵanı Beısembaev málim etti.
- Bıylǵy oqý jylynda 11 myń 800 mektepke deıingi uıymda 1 mıllıonnan astam bala tárbıelenip, bilim alatyn bolady.
Jyl basynan bastap balabaqshalardy vaýcherlik qarjylandyrý pılottyq jobasy elimizdiń 20 qalasy men 7 aýdanynda sátti iske asyrylǵany belgili. Pılottyq kezeńde 461 myń vaýcher berilip, balabaqshaǵa kezektilik 93 myńǵa qysqardy. Nátıjesinde jergilikti bıýdjetterden 7,7 mlrd teńge únemdeldi. Qyrkúıek aıynan bastap bıyldyń sońyna deıin barlyq balabaqshalar kezeń-kezeńimen tolyqtaı osy vaýcherlik qarjylandyrý júıesine ótedi, - dedi Ǵ. Beısembaev Úkimet otyrysynda.
Onyń aıtýynsha, mektep jasyna deıingi balalardy adal eńbekke baýlý maqsatynda 12 myń balany qamtıtyn jańa joba qyrkúıek aıynan bastap elimizdegi 100 balabaqshaǵa pılot retinde engiziledi.
Budan buryn habarlanǵandaı, Memleket basshysynyń tapsyrmasy boıynsha 2024 jyldan bastap Qazaqstanda mektepke deıingi uıymdarda vaýcherlik qarjylandyrý júıesi kezeń-kezeńimen engizilýde.
Bul joba mektepke deıingi bilim berý salasynda qyzmetterdiń qoljetimdiligi men sapasyn arttyrýǵa, sondaı-aq ashyqtyqty qamtamasyz etýge baǵyttalǵan.