Bıyl azyq-túlik óndirisi 10%-ǵa ósti: sala óńdeý ónerkásibinde úshinshi orynda

ASTANA. KAZINFORM – 2025 jyldyń alǵashqy jartyjyldyǵynda azyq-túlik óndirisi 10%-ǵa ósip, kólemi 1,8 trln teńgege jetti. Bul kórsetkish jospardan 5,3 paıyzdyq tarmaqqa artyq. Bul týraly Ekonomıkalyq ósýdi qamtamasyz etý jónindegi shtab otyrysynda aıtyldy.

Vıtse-premer – Ulttyq ekonomıka mınıstri Serik Jumanǵarınniń tóraǵalyǵymen ótken jıynda saladaǵy ósý qarqynyn jedeldetý sharalary qaraldy. Qazirgi tańda tamaq pen sýsyn óndirisi óńdeý ónerkásibi qurylymynda 17,2% úleske ıe. Bul kórsetkish boıynsha tek metallýrgııa men mashına jasaý salalary ǵana alda tur.

Mınıstrliktiń málimetinshe, ósim aýyl sharýashylyǵy shıkizatyn (et, sút, qant qyzylshasy) qaıta óńdeýge, sary maı men irimshikke qajetti shıkizat satyp alýǵa, QQS mólsherlemesin 70%-ǵa tómendetýge jáne jeńildikpen beriletin nesıelerge baılanysty sýbsıdııalardyń esebinen qamtamasyz etilgen.

Ótken jylmen salystyrǵanda kelesi ónimder óndirisinde joǵary ósim tirkeldi:

• sary maı – +10,4%,

• shujyq ónimderi – +10,8%,

• ósimdik maıy – +20,3%,

• balyq ónimderi – +34,4%.

Sonymen qatar maýsymdyq sebepterge baılanysty jarma óndirisi tómendegen. Keıbir óńirlerde kondıterlik ónimder, konserviler, irimshik pen súzbe óndirisiniń qysqarýy shıkizat jetkizý úzilisterimen jáne naryqtaǵy shekteýlermen baılanysty.

Sýsyn óndirisi boıynsha jartyjyldyq kórsetkish 566,7 mlrd teńgeni qurady. Naqty kólem ındeksi 5%-ǵa ósip, jospardan 3,7 paıyzdyq tarmaqqa joǵary boldy. Alkogolsiz sýsyn óndirisi 9,8%-ǵa artqanyna qaramastan, jalpy kólemde tómendeý baıqalǵan.

— Árbir sala mınıstri ózderine qarasty kásiporyndardyń ekonomıkasyna tereń úńilýi qajet. Ósýge kedergi keltiretin jaıttardy jedel joıý kerek. Saýda mınıstrligi óńirlerdegi ótkizý naryǵyn saralap, qajet bolsa, jetkizý júıesin qaıta bólsin. Aýyl sharýashylyǵy mınıstrligi iri kásiporyndardyń úlesin eskerip, jol kartasyn tolyqtyrsyn. «Báıterek» pen Agrarlyq nesıe korporatsııasy ınvestıtsııa tartý jumysyn jandandyrsyn, – dedi Serik Jumanǵarın.

Aıta keteıik, áleýmettik mańyzy bar azyq-túlik taýarlary tranzıtine baqylaý kúsheıdi.