Bıyl aýyl sharýashylyǵynda 50-den astam ınvestjoba iske asqan
ASTANA. KAZINFORM - Bıyl agroónerkásiptik keshen salasynda 30 mlrd teńgeden astam qarjyǵa 50-den astam ınvestıtsııalyq joba iske asty.
Eń kóbi 10 kásiporyn paıdalanýǵa berilgen Túrkistan oblysyna tıesili.
Olardyń qatarynda qýaty jylyna 20 mln jumyrtqa shyǵaratyn qus fabrıkasy, qýaty jylyna 25 myń tonna bolatyn soıý pýnkti, 150 tonnalyq qoıma, 550 tonnalyq eki jylyjaı kesheni, sondaı-aq qýaty 9600 tonna bolatyn sút pen kókónis óńdeý jáne t.b. bar.
Abaı oblysynda 8 jańa kásiporyn quryldy, onyń ishinde mal sharýashylyǵy ónimderiniń gendik qoryn jaqsartý jobasy, jyldyń qýaty 14 400 tonna bolatyn tazartylmaǵan kúnbaǵys maıy men kúnjara óndirisi bar.
Sondaı-aq, 6 sharýashylyq mashına-traktor parkin keńeıtti.
Aqmola oblysynyń kásipkerleri sút-taýar fermalaryn keńeıtý, ósimdik jáne mal sharýashylyǵy ónimderin qaıta óńdeý jobalarynda memlekettik qoldaý sharalaryn paıdalandy.
Atap aıtqanda, qus etinen jasalǵan qurama jem, un, muzdatylǵan jartylaı fabrıkattar óndirisi quryldy. Kásiporyndardyń jalpy qýaty jylyna 4100 tonnany quraıdy.
Jambyl oblysynda qýattylyǵy 30 mln jumyrtqa bolatyn ınkýbator paıdalanýǵa berildi, úsh sharýashylyq ınfraqurylymy bar jańbyrlatý tehnıkasyn ornatty.
Sondaı-aq, shaǵyn bıznes jobalary iske asyrylýda, mysaly, Aqtóbe oblysynda 100 bas mal basyna arnalǵan reprodýktor iske qosyldy, al «Aýyl amanaty» jobasy aıasynda jylyna 4 tonna kókónis shyǵaratyn jylyjaı salyndy.
Pavlodar oblysynda 14 myń tonnaǵa 2 kókónis qoımasy ashyldy, Shyǵys Qazaqstan oblysynda 6000 tonnaǵa astyq qoımasy salyndy, sondaı-aq túıirshiktelgen qurama jem óndirisi jolǵa qoıyldy.
Investıtsııalyq jobalardy iske asyrý aýyl sharýashylyǵyn damytýǵa, óndiristi ulǵaıtýǵa, aýyl sharýashylyǵy ónimderiniń sapasyn jaqsartýǵa, jańa jumys oryndaryn qurýǵa jáne jalpy óńirlerdiń ekonomıkalyq áleýetin arttyrýǵa yqpal etedi.
