Bıyl aýyl sharýashylyǵy jobalaryna 50 mlrd teńge nesıe beriledi
ASTANA. KAZINFORM — Ótken jyly aýyl sharýashylyǵy salasyndaǵy jobalarǵa arnalǵan nesıege 20 mlrd teńge bólingen, bıyl qarajat kólemi 50 mlrd teńgege artyp otyr.
Bul týraly Premer-mınıstr Oljas Bektenovtiń depýtattyq saýalǵa bergen jaýabynda aıtylǵan.
— Úkimet et mal sharýashylyǵyn damytý boıynsha júıeli jumys júrgizip jatyr. Júıeli jumys ishki naryqty tıisti ónim qorymen qamtamasyz etý, óńirlik aýyl sharýashylyǵy kooperatıvterin qurýdy yntalandyrý, mal soıý ınfraqurylymyn damytý, sondaı-aq qarjylaı qoldaý sharalaryn qamtıdy. Aýyl turǵyndaryn kooperatıvter qurýǵa yntalandyrý maqsatynda mıkrokredıt berý jáne lızıng erejelerine tıisti ózgerister engizildi. Ol boıynsha shaǵyn jáne orta kásip sharýalaryna 2,5% jyldyq mólsherlememen 8000 aılyq eseptik kórsetkishke deıin jeńildetilgen nesıe berý kózdelgen, — dep jaýap berdi Úkimet basshysy.
Onyń aıtýynsha, ótken jyly jalpy somasy 4,6 mlrd teńgege 182 kooperatıv qarjylandyryldy.
— Belgili bir ónimdi óndirý úshin jerdi utymdy paıdalaný maqsatynda óńirlerdiń mamandaný kestesi bekitildi. Sonymen qatar, jergilikti atqarýshy organdar 5 jyldyq damý josparyn bekitedi, ol jerde mal sharýashylyǵy salasyn qosa alǵanda, jekelegen salany damytýǵa arnalǵan is-sharalar qamtylǵan. Osy oraıda jeke óńirlik kartany ázirleý erte dep sanaımyz, — dedi ol.
Sondaı-aq, Premer-mınıstr jaýabynda «Aýyl amanaty» baǵdarlamasy aıasynda mal soıý ınfraqurylymyn damytý bóliginde bıýdjet qarajatyn paıdalanýdyń basym baǵyttarynyń biri — iri qara ósiretin sharýalardy qoldaý ekeni aıtylǵan.
— 2024 jyly aýyl sharýashylyǵy jobalaryn nesıeleýge 20 mlrd teńge bólindi, onyń ishinde mal sharýashylyǵyna 603 mıkrokredıt berildi. 2025 jyly 50 mlrd teńge qarastyrylǵan, — dep tolyqtyrdy O. Bektenov.
Aıta keteıik, Kazinform tilshisi bıyl aýyl sharýashylyǵyn qarjylandyrý barysyna sholý jasaǵan edi.