Bıyl «Aýyl amanaty» baǵdarlamasyna 100 mlrd teńge bólinedi
ASTANA. KAZINFORM – Bıyl «Aýyl amanaty» baǵdarlamasy aıasynda 17 myńnan astam jańa jumys orny qurylady. Bul týraly Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«Úkimet «Jaıly mektep», «Aýylda densaýlyq saqtaýdy jańǵyrtý», Turǵyn úı-kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdamasy, Qazaqstan Respýblıkasynyń agroónerkásiptik keshenin damytýdyń 2021-2030 jyldarǵa arnalǵan tujyrymdamasy, «Bir aýyl – bir ónim», «Aýyl – El besigi» jáne taǵy basqa baǵdarlamalyq qujattardyń erejeleri ıntegratsııalanǵan Qazaqstan Respýblıkasynyń aýyldyq aýmaqtaryn damytýdyń 2023-2027 jyldarǵa arnalǵan tujyrymdamasyn qabyldap, iske asyrýda. Aýyl halqynyń tabysyn arttyrý úshin «Aýyl amanaty» baǵdarlamasy júzege asyrylýda. Baǵdarlama aıasynda aýyl sharýashylyǵy kooperatıvterin damytý úshin kredıt berý (8 myń AEK-ke deıin) kózdelgen. Bul aýyl sharýashylyq tehnıkasyn, qajetti jabdyqtardy satyp alý, ósimdik jáne mal sharýashylyǵy ónimderin qaıta óńdeý jónindegi shaǵyn tsehtardy ashý boıynsha yntalandyrý bolady», - dedi Úkimet basshysy jaýabynda.
Premer-Mınıstrdiń dereginshe, baǵdarlama boıynsha 2023 jyly 74,8 mlrd teńge somasyna 12,1 myń mıkrokredıt berildi. Onyń 5,8 mlrd teńge kredıt qarajatyn 287 aýyl sharýashylyǵy kooperatıvi aldy. 2024 jylǵa 16,7 myń mıkrokredıt berý josparymen 100 mlrd teńge bólý kózdelgen. Bul aýylda 17 myńnan astam jańa jumys ornyn qurýǵa múmkindik beredi. Budan basqa, agro ónerkásiptik keshen salasyna, onyń ishinde aýyl sharýashylyǵy ónimderin qaıta óńdeýge ınvestıtsııalar tartý boıynsha jumystar júrgizilýde.
«Máselen, 2023-2026 jyldarǵa arnalǵan agroónerkásiptik keshen ınvestıtsııalyq jobalaryn iske asyrý jónindegi jol kartasy aıasynda 2023 jyly 3 856 jańa jumys ornyn qura otyryp, 275,6 mlrd teńge somasyna 289 ınvestıtsııalyq joba paıdalanýǵa berildi. Onyń ishinde eldiń shekaralas óńirlerinde 224,8 mlrd teńge somasyna 3 myń jumys ornyn qura otyryp, 222 ınvestıtsııalyq joba iske asyryldy. Bul ınvestıtsııalyq jobalar jeńildetilgen kredıtteý, sýbsıdııalaý, jer resýrstary jáne qajetti ınfraqurylymmen qamtamasyz etilgen. Sonymen qatar «Men kásipker» quraly aıasynda «Bir aýyl – bir ónim» jobasy iske asyrylýda. Bul joba qoldanystaǵy qosylǵan qun óndiristik tizbekterine eksporttaý nemese óndirý úshin naryqtyq áleýeti bar óńirlerdegi perspektıvaly taýarlardy anyqtaýǵa múmkindik beredi. Budan basqa, tujyrymdamany iske asyrý aıasynda damý áleýeti joǵary aýyldyq eldi meken (tirek, spýtnıktik AEM) tizbeleri ózektendirilip, árbir óńir boıynsha Aýyldyq aýmaqtardy damytý jol kartalary bekitildi», - dedi Oljas Bektenov.
