Bıyl atyraýlyq oqýshylar qaıda demalady
ATYRAÝ. KAZINFORM — Bıyl atyraýlyq oqýshylar demalatyn 3 lagerdi daıyndaýǵa, balalardy tamaqpen qamtýǵa jáne jol shyǵyndaryna 778 mln teńge qarastyrylǵan.
Jazǵy maýsymda Reseı Federatsııasynyń Jeleznovodsk qalasynda ornalasqan «Qazaqstan Geologi» emdeý pansıonaty, Inder aýdanyndaǵy «Jas Órken» lageri jáne Mahambet aýdanyndaǵy «Araı» lageri jumys isteıdi.
Reseı Federatsııasynda ornalasqan «Qazaqstan Geologi» emdeý pansıonatyna arnaıy sanattaǵy otbasylardan shyqqan 1530 oqýshy jiberiledi. Al óńirge qarasty Inder aýdanyndaǵy «Jas Órken» lagerinde 1008, Mahambet aýdanyndaǵy «Araı» lagerinde 420 oqýshynyń demalysy uıymdastyrylady.
Oblystyq bilim berý basqarmasynyń málimetinshe, qazirgi ýaqytta «Qazaqstan Geologi» emdeý pansıonaty balalardy qabyldaýǵa daıyn. Qalǵan eki lagerde mamyr aıynan bastap aǵymdaǵy jóndeý jumystary júrgiziledi.
— Jalpy 2026 jyly oblys boıynsha 139 746 oqýshyny jazǵy demalys jáne saýyqtyrý sharalarymen qamtý josparlanyp otyr. Bul — óńirdegi oqýshylardyń 95%-y.Bilim berý uıymdary janynan 847 balalar lageri ashylady. Onyń ishinde 166 lagerde balalar tamaqpen qamtylsa, 681-i beıindik baǵytta jumys isteıdi. Bul lagerlerde 3 kezeń boıynsha 126 498 oqýshynyń demalysyn uıymdastyrý josparlanǵan, — dep málimdedi basqarmanyń baspasóz qyzmeti.
Budan bólek, óńirde 120 shatyrly jáne kıiz úı lageri qurylyp, onda 10 230 oqýshy qamtylady. Sonymen birge, 1367 bala ózge óńirlerindegi demalys lagerlerine jiberiledi.
Buǵan deıin Soltústik Qazaqstan oblysynda balalardyń jazǵy demalysynda 10 saýyqtyrý lageri jumys isteıdi dep josparlanǵanyn jazǵan edik.
