Bıyl Atyraýda masa ýlaýǵa 193,6 mln teńge bólingen

ATYRAÝ. KAZINFORM — Bıyl Atyraý qalasynyń ákimdigi masany ýlaý jumysyna 193 mln 648 myń teńge bóldi. Qazir bul jumysty atqarýǵa eki kompanııa kiristi. 

Atyraý qalalyq turǵyn úı-kommýnaldyq sharýashylyq jáne turǵyn úı ınspektsııasy bóliminiń bas mamany Eltaı Aıbatovtyń aıtýynsha, kópqabatty 1200-den astam turǵyn úıdiń jertólesi men kireberisin masaǵa qarsy dezınfektsııalaý bastaldy.

— Masaǵa qarsy dezınfektsııa jumystary qalanyń eki bóliginde júrgiziledi. Merdiger «AG Disinfection services» JShS Jaıyq ózeniniń oń jaq, al «ARTS» JShS sol jaǵalaýda dezınfektsııalaýdy qolǵa aldy. Osyǵan baılanysty turǵyndar tarapynan aryz-shaǵymdy qalalyq turǵyn úı-kommýnaldyq sharýashylyq jáne turǵyn úı ınspektsııasy bólimi jáne 109 biryńǵaı baılanys ortalyǵy arqyly qabyldanady. Dezınfektsııalaý jumysy qaı úılerde júrgiziletini páter ıeleri kooperatıvterine aldyn ala habarlanyp, turǵyndarǵa eskertiledi, — deıdi Eltaı Aıbatov.

Onyń aıtýyna qaraǵanda, masaǵa qarsy ýlaý shahar mańyndaǵy eldi mekenderde, ashyq sý alańdary men saıabaqta, kóshelerde jalǵasady. Qazir Atyraý qalasynyń oń jaǵalaýynda 8 adam men 8 tehnıka, al sol jaq jaǵalaýda 6 adam men 6 tehnıka tartylǵan.

Ákimdiktiń málimetinshe, ashyq elektrondyq konkýrstyń qorytyndysymen 2 merdiger anyqtalǵan. Onyń biri — «AG Disinfection services» JShS-ǵa 99 mln 680 myń teńge, al ekinshisi — «ARTS» JShS-ǵa 93 mln 968 myń teńge bólingen.

«ARTS» JShS-nyń joba menedjeri Maqsat Jańaevtiń pikirinshe, masaǵa qarsy dezınfektsııalaýǵa qoldanylatyn birneshe preparat bar. Onyń qorshaǵan ortaǵa da, adamdarǵa da zııany joq.

— Dezınfektsııalaý jumystaryna agran, tsıperrmetrın, antı-ınsekta, faskon preparattaryn qoldanamyz. Jumystar arnaıy kestege saı atqarylady, — deıdi Maqsat Jańaev.

Eske sala ketelik, budan buryn Atyraýda 8-9 sáýirde jylý jelilerinde temperatýra parametri kóteriletinin habarlaǵan edik.