Bıyl Atyraýda MÁMS júıesi arqyly tis emdeýge 1,1 mlrd teńge bólindi

ATYRAÝ. KAZINFORM - Atyraý oblysynda aýyz qýysyndaǵy syrqatty tegin emdetýge 225028 qyzmetke 1 mlrd 198 mln teńgeden astam qarjy bólingen. Onyń 14 mln teńgege jýyǵy týa bitken patologııasy bar jas órenderge ortodontııalyq kómek kórsetýge baǵyttalǵan.

Bul qyzmetti MÁMS júıesi arqyly 14 memlekettik, 11 jekemenshik medıtsınalyq uıymda júzege asyrady. Degenmen mundaı kómek bárine birdeı qoljetimdi emes. Tegin stomatologııalyq qyzmet 18 jasqa tolmaǵan balalarǵa jáne áleýmettik osal sanattaǵy azamattarǵa arnalǵan.

- Stomatologııalyq kómektiń tártibi DSM №106 buıryǵyna sáıkes júzege asyrylady. Bul stomatologııalyq kómek kimge kórsetiledi? Josparly túrde eń aldymen balalarǵa jáne júkti áıelderge, shuǵyl kómek 1,2,3 toptaǵy múgedektigi bar adamdar, ataýly áleýmettik kómek alýshylarǵa, «Altyn alqa», «Kúmis alqa» ıegerlerine qyzmet kórsetiledi,-dedi «Áleýmettik medıtsınalyq saqtandyrý qory» KeAQ AOF bólim basshysy Almaz Kárimjanov.

Dárigerlerdiń sózinshe, turǵyndar kóbine tis jıeginiń aýrýymen shaǵymdanady eken. Onyń ishinde tisti túzetý qyzmeti de bar. Biraq ondaı múmkindikti tek týa bitken patologııasy bar balalar qoldana alady. Tegin stomatologııalyq qyzmet arqyly jekelegen sanatqa jatatyn azamattar úshin mindetti áleýmettik medıtsınalyq saqtandyrý júıesi arqyly tis juldyrý, plomba saldyrýǵa bolady.Josparly stomatologııalyq kómekke turaqty tekserý, profılaktıkalyq protsedýralar,karıesti emdeý,tisterdi julý (qarapaıym jáne kúrdeli),plombalardy daıyndaý jáne salý (hımııalyq qataıtylǵan kompozıttik materıaldardan),fıssýralardy tyǵyzdaǵyshtarmen jabý syndy profılaktıkalyq jáne emdik sharalar kiredi. Balalar men júkti áıelderge qol jetimdi.

Eger shuǵyl kómek kerek bolǵan jaǵdaıda zeınetkerler, UOS ardagerleri, 1,2,3 toptaǵy múgedektigi bar adamdar, múgedektigi bar balaǵa nemese birinshi toptaǵy múgedektigi bar adamǵa kútim jasaıtyn, jumys istemeıtin azamattar, «Altyn alqa», «Kúmis alqa» ıegerlerine tegin qyzmet ala alady.

Mamandar aldymen emhanalardyń Qormen kelisim shartynyń bar-joǵyn anyqtap alýdy eskertedi.

Aıta keteıik, qazirgi ýaqytta Atyraý oblysynda 71 myń azamat MÁMS júıesinde saqtandyrylmaǵan.

Osyǵan deıin elimizde MÁMS engizilgennen bastap 90%-dan astam adam saqtandyrylǵanyn habarlaǵan edik.