Bıyl Atyraýda qum kóshkinine qarsy sekseýil men jyńǵyl egilmeıdi
ATYRAÝ. KAZINFORM – Bıyl Atyraý oblysynda qum kóshkinine qarsy sekseýil nemese jyńǵyl egý jumystary júrgizilmeıdi. Tek keıingi bes jylda istelgen jumys merdiger mekemeler tarapynan kútip ustalady.
Atyraý oblystyq tabıǵı resýrstar jáne tabıǵat paıdalanýdy retteý basqarmasynyń basshysy Erbolat Omarovtyń aıtýynsha, keıingi 5 jyl ishinde Jylyoı, Isataı, Qyzylqoǵa jáne Qurmanǵazy aýdandarynyń eldi mekenderinde jalpy aýmaǵy 76,5 gektar jerde qum kóshkinine qarsy jumystar júrgizilgen. Endi aýdan ákimdikteriniń usynystary negizinde jańa ýchaskeler aıqyndalyp, tıisti jobalyq-smetalyq qujattama ázirlenedi.2026 jyly jumystardyń naqty aýqymy aıqyndalyp, memlekettik saraptamadan ótkennen keıin kelesi jyly bıýdjetten qarjy suraý josparlanyp otyr.
Sonymen qatar Isataı aýdanynda Kaspıı teńizi deńgeıiniń tómendeýine baılanysty jaǵalaý boıynda qum kóshkinin toqtatýdyń jańa ádisi qarastyrylyp jatyr. 100 shaqyrymǵa jýyq aýmaqty qamtıtyn jobanyń smetalyq qujattamasyn ázirleýge shamamen 100 mln teńge qajet. Qazir bul maqsatqa kerekti qarjy suralyp jatyr.
– Ákimdiktiń jáne turǵyndardyń usynystary boıynsha aldyn ala núkteler men aımaqtar belgilenip, shamamen 100 shaqyrymǵa jýyq aýmaq naqtylanatyn bolady. Jobalyq-smetalyq qujattamany ázirleıtin mekeme qaı jerde qandaı jumys júrgizý kerektigin ǵylymı turǵyda negizdep beredi. Sodan keıin naqty sheshim qabyldanady. Ol jerde tek aǵash egý emes, qamystan, aǵashtan nemese ózge de materıaldardan arnaıy kedergiler jasaý máselesi qarastyrylýda. Mundaı jumystyń ózindik mehanızmi bar, - dedi basqarma basshysy Erbolat Omarov.
Aıta keteıik, sońǵy 3 kún boıy Kaspııden Atyraýǵa shańdy daýyl soqty.