Bıyl Atyraýda ekologııanyń turǵyndarǵa áserin ǵylymı zertteý bastalady
ATYRAÝ. KAZINFORM – Bıyl óńirdiń ekologııasynyń adamdarǵa áserin ǵylymı turǵyda zertteý bastalady. Bul jóninde Atyraý oblysy ákiminiń orynbasary Jasulan Bısembıev aıtty.
2025 jyldyń qyrkúıeginde óńirge DDU ókilderi keldi. Olardyń arasynda uıymnyń Eýropalyq aımaqtyq bıýrosynyń dırektory da bar. Oblys ákimdigi hlyqaralyq uıym ókilderimen kelissózder júrgizip, bıyldan bastap medıtsınalyq zertteýlerdi jasaýǵa kirisedi. Búginde DDU men ákimdik arasyndaǵy 3 jyldyq jumys jospary ázir.
- Qujat DDU-na joldandy. Birinshi keri baılanysty ótken jyldyń jeltoqsanynda aldyq . Qazirgi tańda jospardyń keı tustaryn naqtylaý jumysy júrip jatyr.Josparǵa sáıkes jol kartasy aqpan aıynda bekitiledi. Odan keıin zertteýlerge kirisemiz. Osy taqyryp kóterilgende turǵyndar tarapynan «DDU óńirge qarajat úshin kelip jatyr» degen syndy negatıvti pikirler boldy. Bul uıym halyqaralyq deńgeıde jumys isteıtin bolǵannan keıin kommertsııalyq maqsatty kózdemeıdi. Bizdiń jaǵdaıymyzda uıym mamandary keńes berip, metodologııalyq súıemeldeıdi. Kelisimge sáıkes ekologııalyq zertteýdiń barlyǵyn DDU-men rastalǵan zerthanalar júrgizetin bolady, - dedi aımaq basshysynyń orynbasary Jasulan Bısembıev.
Qazaqstanda uıym talaptaryna saı keletin birneshe laboratorııa bar. Ádette mundaı zerthanalar medıtsınalyq bilim beretin joǵary oqý oryndaryna qaraıdy.
- DDU seriktesteriniń biri - Astana medıtsına ýnıversıteti. Ondaǵy mamandar halyqaralyq standarttarmen sertıfıkattalǵan. Qazirgi ýaqytta jergilikti bıýdjetten 300 mln teńgege jýyq qarjy qarastyryp otyrmyz. Zertteýdi naqty osy mekemeniń zerthanasy júrgizedi dep dóp basyp aıtý qıyn. Zań talaptaryna saı konkýrstyq rásimder bolyp, memlekettik satyp alý portalyna jarııalanady. Sodan keıin ǵana naqty qarajaty men merdiger mekeme belgili bolady. Merdigerge qoıar talabymyz qatań. Zerthananyń arnaıy lıtsenzııasy, onda jumys isteıtin mamandar halyqaralyq standarttarǵa saı kelýi tıis , - dep qosty Jasulan Bısembıev.
Jasulan Bısembıevtiń sózinshe, halyqaralyq standarttarǵa sáıkes sý, aýanyń tazalyq kórsetkishterin dınamıkalyq turǵydan qaraý qajet. Sondyqtan ekologııalyq jáne medıtsınalyq zertteý túrleri 3 jyl qatarynan júrgizý josparlanyp otyr. Basty maqsat- munaı óndirý, óńdeý salasynyń adam aǵzasyna qandaı zııan keltiretinin anyqtaý. Zertteý jumystary qorytyndylanǵannan keıin ǵana óńirdi ekologııalyq apatty aımaq dep taný men tanbaý suraǵy qarastyrylmaq.
Ótken jyldyń sońyna jýrnalısterdiń suraqtaryna jaýap bergen aımaq basshysy Serik Shápkenov Atyraý oblysyna ekologııalyq apat aımaǵy mártebesin berý týraly sheshim qabyldaý úshin vedomstvoaralyq komıssııa quryp, onyń kelisimin alý qajettigin aıtqan edi.