Bıyl Atyraýda balalar quqyǵyn qorǵaıtyn basqarma qurylmaq

ATYRAÝ. KAZINFORM – Atyraý oblysynda balalardyń quqyǵyn qorǵaýdy kúsheıtý maqsatynda arnaıy basqarma qurylady. Bul málimetti oblys ákimdiginiń baspasóz qyzmeti rastady.

Bul tapsyrmany oblys ákimi Serik Shápkenov bergen. Onyń aıtýynsha, qazirgi tańda mekteptegi túrli jaǵdaıǵa tek bir tarap emes, barlyq qatysýshy – pedagogter, ata-analar, oqýshylar jáne quqyq qorǵaý organdary birdeı jaýapty.

- Barlyq tarap kúsh biriktirgende ǵana qaýipsiz ári qoldaýshy bilim berý ortasyn qalyptastyra alamyz. Sol sebepti balalar quqyǵyn qorǵaý basqarmasyn ashý qajet. Ol jaýapty qyzmetterdiń jumysyn úılestirip, quqyq buzylǵan jaǵdaıda jedel áreket etýdi qamtamasyz etedi, aldyn alý sharalaryn kúsheıtedi jáne balalarǵa meıli mektepte, meıli odan tys jerde de qaýipsiz orta qalyptastyrady, – dedi oblys ákimi Serik Shápkenov.

Sońǵy ýaqytta óńirde oqýshylardyń qatysy bar qylmystar kópti shoshytty. Mysaly, qatarlastaryn baltamen qýalaǵan oqýshynyń is-áreketi óńirdegi bilim ordalaryndaǵy kúzet qyzmetin tekserýge sebep boldy.

Al naýryzda 9 synyp oqýshysy 8 synypta bilim alatyn qyzdy úshkir zatpen jaraqattaǵan edi.

Kúni keshe Atyraýdaǵy saýda-oıyn-saýyq ortalyqtarynyń birinde kámeletke tolmaǵan jasóspirim qaýipsizdik talaptaryn buzyp, nysanǵa shyǵyn keltirdi.

Mekteptegi oqýdy aıaqtaǵan jastar men oqýshylar arasyndaǵy baılanys, býllıng, qaýipsizdik, bilim ordasy men ata-ana arasyndaǵy qarym-qatynas syndy birqatar máseleni dırektorlar oblys ákimi deńgeıinde kóterip, sapaly kúzet qyzmetin kúsheıtýdi surady.