Bıyl Atyraý oblysynda 35,7 myń adam jumyspen qamtylady
Bıyl Atyraý oblysynda «2021-2025 jyldarǵa arnalǵan kásipkerlikti damytý mjónindegi» ulttyq joba sheńberinde jumyspen qamtý sharalaryna 35,7 myńnan astam adamdy tartý josparlanǵan, dep habarlaıdy Kazinform.
Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń málimetinshe, 9 348 adam turaqty, 5 799 adam bıýdjet esebinen qarjylandyrylatyn ýaqytsha jumys ornyna jiberiledi.
«Atap aıtsaq, bıyl áleýmettik jáne qoǵamdyq jumystarǵa, jastar praktıkasyna, «Alǵashqy jumys orny» men «Kúmis jas», «Urpaqtar kelisimsharty» jobalaryna ornalastyrylyp, byltyr múgedektigi bar adamdar úshin qurylǵan arnaıy jumys oryndaryn qosa eseptegende 16 myń adamnyń jalaqysyn ishinara sýbsıdııalaý kózdelip otyr. Buǵan qosa qysqa merzimdi oqý kýrstaryna 585 adam jiberilip, onlaın skills arqyly 1 880 adam qamtylady. Al, 72 adam vaýcherden ótkiziledi. «Bastaý-bıznes» jobasymen kásipkerlik negizderine 2 615 adam oqýǵa jiberilip, óz isin ashý baǵytynda halyqtyń áleýmettik osal sanattaryndaǵy 291 adamǵa qaıtarymsyz granttar men 2,5 paıyzdyq jeńildik, 142 jasqa mıkrokredıt beriletin bolady», - dep habarlady Azamat Mámbetov.
Sondaı-aq 15 041 adamdy kásiptik baǵdarlaýdan ótkizý kózdelgen. Múmkindigi shekteýli jandar men probatsııa esebinde turǵan, jazasyn óteý oryndarynan bosap shyqqan adamdar úshin jumysqa ornalastyrý kvotasy belgilenip, mekemeler tizbesi bekitilgen.
Eske sala ketelik, buǵan deıin Atyraý oblysynda múmkindigi shekteýli 273 adam turaqty jumysqa ornalasqanyn jazǵan bolatynbyz.
