Bıyl Astanaǵa 1,7 mln týrıst keledi degen boljam bar

ASTANA. KAZINFORM – Qazaqstannyń elordasy týrıstik áleýetin arttyra otyryp, óńirdegi iri mádenı ortalyqtardyń birine aınalady. Astana qalasynyń týrızmdi damytý ortalyǵynyń basshysy Artem Kvashýk osylaı málimdep otyr.

- Halyqaralyq ártisterdiń, uıymdastyrýshylar men týrısterdiń Astanaǵa degen qyzyǵýshylyǵyn baıqap otyrmyz. Ótken jyldyń qorytyndysy boıynsha Astana 1,5 mln-nan astam týrısti qabyldady, onyń 340 myńy sheteldik qonaq. Bıyl bul kórsetkish odan da joǵary bolady dep kútip otyrmyz, ıaǵnı shamamen 1,7 mln adam. Aıta ketsek, bıyl birinshi toqsanda qalany 300 myńnan astam adam aralady, onyń ishinde 68 myńy sheteldik týrıst, – dedi Artem Kvashýk ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, elorda tek saıası jáne iskerlik is-sharalar ǵana emes, aýqymdy mádenı oqıǵalar alańyna aınaldy.

- Aıtar bolsaq, Backstreet Boys tobynyń kontserti sııaqty aýqymdy is-shara tólem qabileti joǵary týrısterdi tartady. Sonymen qatar qala ekonomıkasyn yntalandyryp, halyqaralyq arenadaǵy bedelin arttyrady», – deıdi ol.

Sondaı-aq týrıstik ortalyq basshysy elorda ınfraqurylymy týrısterdi qabyldaýǵa daıyn ekenin aıtyp otyr.

- Qala ınfraqurylymy jaqsy damyǵan jáne qonaqtardy qabyldaýǵa tolyq daıyn. Astanada 299 qonaqúı jumys istep tur, onyń 9-y bes juldyzdy, sondaı-aq 3–4 juldyzdy 100-ge jýyq qonaqúı bar, – dep tolyqtyrdy spıker.

Odan bólek, elordada ótetin iskerlik is-shara sany artqan.

- Jyl saıyn Astana qalasynyń oqıǵalar qalasy retindegi mártebesi nyǵaıyp keledi. Mysaly, byltyr 128 is-shara ótse, bıyl 201 is-shara josparlanyp otyr, – dedi A. Kvashýk.

Astana qalasyna otandyq jáne sheteldik týrısterdi tartýǵa qatysty mańyzdy is-sharaǵa toqtalsaq, Backstreet Boys tobynyń kontsertine bılet 14 shildede satylymǵa shyǵady. Kontsert Almaty jáne Astana qalasynda ótedi.

Sondaı-aq bıyl 1 tamyzda álemge tanymal pop-juldyz Djennıfer Lopes Astanada kontsert beredi.