Bıyl Astanada qansha bala mektep tabaldyryǵyn attaıdy

ASTANA. KAZINFORM — Astanada 1 sáýirden bastap 31 tamyzǵa deıin jalpy bilim beretin orta mektepterdiń birinshi synybyna qujattardy qabyldaý júrgiziledi. 

Aldaǵy oqý jylynda birinshi synypqa boljammen 30 myńnan astam bala keledi dep kútilip otyr. Bul týraly Astana qalasy bilim basqarmasy basshysynyń orynbasary Marjangúl Qaıyrbaeva Kommýnıkatsııalar qyzmetinde ótken brıfıngte málim etti.

Spıkerdiń aıtýynsha, Astanada 196 orta bilim berý uıymy bar, onda 288 000-nan astam oqýshy bilim alyp jatyr. Birinshi synypqa qujat qabyldaý 1 sáýirde bastalyp, 31 tamyzǵa deıin jalǵasady.

Ótinishti www.egov.kz portaly arqyly onlaın nemese qaǵaz nusqada mektepke baryp tapsyrýǵa bolady. Mekteptiń qyzmet kórsetý aýmaǵynda turatyn barlyq 6 jastaǵy jáne sol jyly 6-ǵa tolatyn balalardy daıyndyq deńgeıine qaramastan, birinshi synypqa qabyldaıdy.

— Mektepke qabyldaý úshin ata-anadan nemese zańdy ókilinen ótinish, balanyń densaýlyq jaǵdaıy týraly anyqtamasy jáne densaýlyq pasporty, sondaı-aq, tsıfrlyq fotosýreti qajet. Mektepter birinshi synypqa baratyn balalardy eshqandaı emtıhansyz qabyldaıdy. Tek mamandandyrylǵan bilim berý uıymdaryna konkýrs negizinde qabyldandady. Onda úmitkerlerden qujatty qabyldaý 1 aqpanynan bastap 15 sáýir aralyǵynda júrgizilýde. Birinshi synypqa qabyldaý barynsha jeńildetildi. Barlyq protsess ashyq júrgiziledi, al mektepter zańda kórsetilgen qujattardan basqa qosymsha anyqtamalar talap ete almaıdy. Ótinishti ýaqytynda tapsyrý qajet, sońǵy kúnge qaldyrmańyz, — dep atap ótti vedomstvo basshysynyń orynbasary.

Birinshi synypqa qabyldaý úshin kelesi qujattar qajet:

* ata-anadan nemese zańdy ókilinen ótinish;
* «Profılaktıkalyq ekpeler kartasy» (№ 065/ý);
* «Bala densaýlyǵynyń pasporty» týraly (№ 052-2/ý) medıtsınalyq anyqtamalar;
* balanyń 3×4 sm ólshemindegi tsıfrlyq fotosýretin tapsyrýy qajet.

— Qujattardy www.egov.kz portaly arqyly onlaın nemese qaǵaz nusqada mektepke baryp tapsyrýǵa bolady. Qaǵaz túrinde ótkizgen kezde qosymsha ata-anasyn nemese zańdy ókili ekendigin rastaıtyn jeke kýáligi talap etiledi. Qujattar ár aptanyń dúısenbi jáne juma kúnderi aralyǵynda qabyldanady. Bilim berý uıymy ata-anadan tizbede kórsetilmegen qujattardy talap etýge quqyǵy joq, — deıdi Marjangúl Qaıyrbaeva.

Buǵan deıin 170-ten asa áskerı qyzmetshi áskerı paradqa qatysý úshin Astanaǵa kelgenin jazǵan edik.