Bıyl Astanada 30 qoǵamdyq oryn ashyldy
ASTANA. KAZINFORM - Astana qalasynyń ákimi Jeńis Qasymbek Instagram paraqshasynda qalada atqarylǵan sharýalar týraly jazdy, dep habarlaıdy elorda ákimdiginiń resmı saıty.
«Bıyl qalany kórkeıtý boıynsha aýqymdy jumys júrgizildi! 140-qa jýyq aýla men 30 qoǵamdyq keńistik (saıabaqtar, gúlzarlar, jelekjoldar, alleıalar) abattandyryldy. Qala turǵyndary men qonaqtary bos ýaqytyn paıdaly ótkizetin tartymdy oryndar kóptep ashyldy.
Máselen, turǵyndar Máńgilik el dańǵyly, Álıhan Bókeıhan jáne Orynbor kósheleriniń kvadratynda ornalasqan ýchaskeni abattandyrý máselesin kóterdi. Biz bul jerdegi saıabaqty abattandyrdyq. Ol birneshe fýnktsıonaldy aımaqqa bólingen, olardyń árqaısysy túrli toptaǵy kelýshilerge arnalǵan. Bul mańaıda serýendeý alańy, demalysty jaılylyqta ótkizýge arnalǵan aımaq – munda mádenı is-sharalarǵa arnalǵan shaǵyn amfıteatr, kógaldandyrylǵan aımaq, balalarǵa arnalǵan oıyn alańy – túrli keshenderi bar oıyn alańdary, átkenshekter men qumsalǵyshtar bolady. Qazirgi ýaqytta sońǵy jumystary júrip jatyr.
Sonymen qatar, «Jastar» saıabaǵy aıtarlyqtaı ózgerdi. Munda skeıt-park, pamp-trek, oıyn aımaǵy jáne t.b. ornatyldy. Saıabaq aýmaǵynda qazirgi zamanǵy
«Sana» sport kesheni de jumys isteıdi.
Bıyl qalanyń vokzal mańy men oǵan irgeles jatqan Birjan Sal jáne Gete kósheleri abattandyryldy. Vokzal mańyndaǵy kóshelerdiń jalpy uzyndyǵy – 1,5 km. Sol sııaqty munda 5 qoǵamdyq keńistikti abattandyrý qarastyryldy.
Táýelsizdik saraıynyń aldynda ornalasqan «Qazaq Eli» alańynda jalpy aýdany 13 ga aýmaqty abattandyryp, kógaldandyrý boıynsha aýqymdy jumys júrgizdik.
Bul jumyspen qalanyń barlyq aýdanyn qamtydyq. Kelesi jyly da aýlalar men qoǵamdyq keńistikterdi (gúlzarlar, jelekjoldar, saıabaqtar) abattandyrý boıynsha aýqymdy jumys júrgizýdi josparlap otyrmyz», – dep jazdy elorda ákimi.
