Bıyl Astanada 24 mektep paıdalanýǵa beriledi

ASTANA. KAZINFORM – Osy jyly sondaı-aq qalaǵa tıesili emdeý mekemelerin kóbeıtý kózdelip otyr. Qalanyń áleýmettik qajettiligin óteýmen qatar, abattandyrý jaǵy da umyt qalmaǵan. Bıyl úı aýlalary men saıabaqtardy jańǵyrtý jumysyna jan bitken. Bul sharýa keler jyly da shıraıdy. Bul týraly Jibel Joly telearnasynyń jańalyqtarynda aıtyldy.

«Adam qala úshin emes, qala adam úshin» qaǵıdatyn basshylyqqa alý kerek. Prezıdent elordany damytý jáne abattandyrý kezinde soǵan basa mán berýdi tapsyrǵan. Mysaly kópten bos jatqan «Kerýen» saýda, oıyn-saýyq ortalyǵynyń mańy saıabaqqa aınalyp shyǵa keldi. Biraq, sol aýmaqqa qatysty basqalaı usynystar da bolǵan.

– Qonaev pen Dostyq kóshelerinde mashınalar kóp ótedi, keptelis bar. Ol jerde saýda ortalyqty da salýǵa usynys bolǵan, turǵyn úıdi de. Kóptegen usynystar boldy. Prezıdent ony ınternette oqyp, osyndaı tapsyrma bergen, - deıdi Astana qalasynyń ákimi Jeńis Qasymbek. 

Sondaı-aq aldaǵy jyly qalanyń shet aýmaqtaryna da kóńil bólip, kórkeıtý kózdelip otyr.

– Osy aýmaqty abattandyrý jumysy aıaqtalýǵa jaqyn. Bunda 600-den asa tal otyrǵyzylǵan. Keler kóktemde tóńirekti kógertý jalǵasady. Jalpy qala boıynsha 40-qa jýyq saıabaq ashylyp jatyr. 140-tan asa úı aýlasy jónge keltirildi. 2025 jylǵa da sondaı jospar. 6 aýdan tolyq abattandyrylady. Ózgeris kózge uryp tur, - deıdi turǵyndar.

Astanaǵa qonys aýdarýshylar da kóp. Sońǵy 3 jylda 200 myń turǵynǵa tolyqqan. Demek, áleýmettik nysandarǵa da suranys artady. Bıyl 32 mektep qurylysy bastalǵan. Balabaqshalar da, emdeý mekemeleri de kerek.

– Bıyl Astanada 1 mln.nan asa kóshet otyrǵyzyldy. Jalpy, qala aýdandarynyń ákimdikteri ýrbanıstıka ortalyǵy únemi birlesip jumys isteıdi. Elordamyzdyń ınfraqurylymdyq sapasynyń ósýine yqpal etý úshin keńes beremiz, - dedi Ýrbanıstıka ortalyǵy basshysynyń orynbasary Baqtııar Bekenov.

Astana ákiminiń aıtýynsha, bıyl 32 mektep qurylysyn bastap, 24-in jyl sońyna deıin aıaqtaý kózdelgen.

– 24 mektep degen ol kemi 3 myń muǵalim. Ol muǵalimderdi daıyndaý kerek. Tek qana myna tikeleı qalaǵa arnalǵan aýrýhanalar sońǵysy 12-13 jyldary salynǵan. Qazir salynyp jatqandary respýblıkalyq mańyzy bar ortalyqtar. Endi olar da tósek oryndaryn berip jatyr. Biraq, tek qalaǵa arnalǵan aýrýhanalar qurylysy bıyl bastaldy, - deıdi Astana qalasynyń ákimi Jeńis Qasymbek.

Astana – eń ıntellektýaldy qoǵamdastyqtyń biri retinde ozyq 21 qalanyń sapynda tur. Dúnıe júziniń 75 eliniń 2 myńnan asa kompanııasy bıznes júrgizý úshin Astana halyqaralyq qarjy ortalyǵyn tańdaǵan. ıÝNESKO sheshimimen «Beıbitshilik qalasy» atandy. Biraq, bundaı úlken kórsetkishter qalanyń úılesimdi damýymen únemi sáıkes kele bermeýi múmkin. Sondyqtan aldymen turǵyndarǵa jaǵymdy, qonaqtarǵa qolaıly bolýy mańyzdy.

Buǵan deıin habarlanǵandaı, elordada «Smartfonsyz mektep» jobasy iske qosyldy.