Bıyl Astanada 122 zańsyz qoqys orny anyqtaldy
ASTANA. KAZINFORM – Elordadaǵy ózekti ekologııalyq máselelerdiń biri jyl saıyn ruqsat etilmegen zańsyz qoqys oryndarynyń paıda bolýy. Bul týraly Astana qalasynyń Qorshaǵan ortany qorǵaý jáne tabıǵatty paıdalaný basqarmasy bastyǵynyń orynbasary Medet Djalpybaev málim etti.
Spıkerdiń aıtýynsha, qalada tazalyq jumystary turaqty júrgizilgenimen, keıbir turǵyndar men kásipkerlik sýbektileri, ásirese qurylys nysandarynyń ókilderi qoqysty belgilenbegen oryndarǵa tógedi. Sonyń saldarynan zańsyz qoqys oryndary paıda bolyp, qorshaǵan ortaǵa zııan keltirip otyr.
Osyǵan baılanysty jyl saıyn «Qazaqstan ǵarysh sapary» ulttyq kompanııasynyń geoportaly arqyly ǵaryshtyq monıtorıng júrgizilip, ruqsat etilmegen qoqys oryndary anyqtalady.
– Bıyl Astanada 122 zańsyz qoqys oryndary anyqtaldy, qazirgi tańda onyń 68-i tolyq tazartyldy, qalǵan ýchaskeler boıynsha joıý jumystary jalǵasyp jatyr. Salystyrmaly túrde aıtsaq, 2025 jyly 328 zańsyz qoqys oryndary anyqtalǵan bolatyn. Bul zańsyz qoqys oryndarynyń sanynyń aıtarlyqtaı azaıǵanyn kórsetedi jáne atqarylyp jatqan jumystardyń oń nátıjesin dáleldeıdi, – dedi spıker Astana qalasynyń kommýnıkatsııalar qyzmeti alańynda ótken brıfıngte.
Onyń sózinshe, atalǵan máselemen kúresý maqsatynda qala ákimdigi tarapynan birqatar shara qolǵa alynǵan. Atap aıtqanda, zańsyz qoqys jıi tógiletin oryndarǵa 122 beınebaqylaý kamerasy ornatylǵan. Sondaı-aq Polıtsııa departamenti, «iKomek 109» baılanys ortalyǵy jáne aýdan ákimdikterimen birlesip turaqty monıtorıng júrgiziledi.
– 2026 jyldyń 7 aıynda 30 myńnan astam quqyq buzýshy ákimshilik jaýapkershilikke tartylyp, 73 mıllıon teńgeden astam aıyppul salyndy, – dedi ol.
Budan bólek, Astana qalasynda qurylys qaldyqtaryn basqarý qaǵıdalary bekitilgen. Osy talaptardyń saqtalýyn baqylaý úshin qurylys nysandarynda turaqty reıdtik is-sharalar ótkiziledi.
– Bıyldan bastap «Severnaıa grıada» deıtin qurylys qaldyqtaryn qabyldaıtyn polıgonnyń qyzmeti tolyq tsıfrlandyryldy, ıaǵnı «Smart Waste» tsıfrlyq platformasy engizildi. Polıgonmen qurylys qaldyqtaryn shyǵaratyn jeke qurylys kompanııalary, sondaı-aq memlekettik qurylys nysandarynyń merdigerleri de kelisimsharttaryn osy platforma arqyly rásimdeıdi. Bul qurylys qaldyqtarynyń qozǵalysyn baqylaýǵa jáne olardyń resmı polıgonǵa shyǵarylýyn qadaǵalaýǵa múmkindik beredi. Zańsyz qoqys oryndarynan qaldyqtardy shyǵaryp, aýmaqty qalpyna keltirýdemiz. Jalpy qoqys anyqtalǵan jaǵdaıda ony joıý boıynsha jaýapty mekemeler jedel áreket etip jatyr, – dep tolyqtyrdy Medet Djalpybaev.
Buǵan deıin Pavlodarda 100-ge jýyq zańsyz qoqys oryndary anyqtalǵanyn jazǵanbyz.
