Bıyl áskerı jıyndarǵa shaqyrylatyndar sany belgili boldy
ASTANA. KAZINFORM – Bıyl Qazaqstanda 3 000 áskerı mindetti áskerı jıyndarǵa shaqyrylady. Bul týraly Qorǵanys mınıstrligi buıryǵynda kórsetilgen.
– «Áskerı qyzmet jáne áskerı qyzmetshilerdiń mártebesi týraly» Qazaqstan Respýblıkasynyń Zańy 33-babynyń 1) tarmaqshasyna sáıkes 2026 jyly 3 000 áskerı mindetti áskerı jıyndarǵa shaqyrylsyn, - delingen qujatta.
Sonymen qatar Qarýly Kúshter Bas shtabynyń Uıymdastyrý-jumyldyrý jumystary departamentine buıryqty Qazaqstan Respýblıkasynyń zańnamasynda belgilengen tártippen Ádilet mınıstrliginde memlekettik tirkeýden ótkizý, al alǵashqy resmı jarııalanǵan kúninen keıin Qorǵanys mınıstrligi ınternet-resýrsyna ornalastyrý jáne osy buıryq jarııalanǵan kúnnen bastap on kún ishinde atqarylǵan jumystar týraly málimetterdi mınıstrliktiń Zań departamentine joldaý tapsyrylǵan.
Buıryqtyń oryndalýyn baqylaý Qorǵanys mınıstriniń birinshi orynbasary – QR Qarýly Kúshteri Bas shtabynyń bastyǵyna júktelgen. Qujat múddeli laýazymdy tulǵalar men qurylymdyq bólimshelerge jetkizilip, alǵashqy resmı jarııalanǵan kúninen keıin kúntizbelik on kún ótken soń qoldanysqa engiziledi.
Buǵan deıin QR Qorǵanys mınıstriniń orynbasary Asqar Mustabekov Májiliste jastardy áskerı-patrıottyq tárbıeleý júıesin damytý baǵytynda atqarylyp jatqan jumystar týraly baıandaǵan edi.