Bıyl áskerı qyzmetshilerdiń 7,7 mlrd teńge nesıesi keıinge shegerilgen
ASTANA. KAZINFORM – Bıyl 36 myńnan astam áskerı qyzmetshi nesıe tólemin keıinge qaldyrý múmkindigin paıdalanǵan. Sonymen qatar qaryzy óndirip alý kezeńine ótip ketken azamattarǵa qatysty da qorǵanys sharalary qarastyrylǵan.
– 2026 jylǵy mamyrdaǵy jaǵdaı boıynsha 36,5 myń áskerı qyzmetshi jalpy kólemi 7,7 mlrd teńge nesıe tólemderin keıinge qaldyrý múmkindigin paıdalandy. Sonymen qatar nesıesi óndirip alý kezeńine ótken azamattarǵa da qosymsha qorǵanys sharalary qarastyrylǵan. ıAǵnı azamat áskerge shaqyrylǵanǵa deıin qaryz máselesi kúrdeli bolǵan jaǵdaıda da, áskerı qyzmet ótkerý kezeńinde qaryz boıynsha óndirip alý sharalary ýaqytsha toqtatylady, - deıdi Qarjy naryǵyn retteý jáne damytý agenttigi resmı jaýabynda.
Al bıyl 43 myńnan astam azamatty merzimdi áskerı qyzmetke shaqyrý josparlanǵan. Bul týraly QR Qorǵanys mınıstrligi Bas shtaby Uıymdastyrý-jumyldyrý departamentiniń baǵyt aǵa ofıtseri, podpolkovnık Albert Bekmuhanov Kazinform tilshisine bergen suhbatynda aıtty. Onyń sózinshe, kóktemgi naýqanda 20 myńnan astam azamat áskerke shaqyrylady.
Podpolkovnıktiń aıtýynsha, merzimdi áskerı qyzmettiń bedeli men tartymdylyǵyn arttyrý maqsatynda «Áskerı qyzmetshilerdiń mártebesi týraly» zańǵa jáne «Qazaqstan Respýblıkasyndaǵy bankter jáne bank qyzmeti týraly» zańǵa ózgerister engizilgen. Sonyń nátıjesinde áskerge shaqyrylǵan azamattarǵa kredıttik kanıkýl avtomatty túrde rásimdeledi.
– 2025 jyly 32 myń áskerı qyzmetshige 8,5 mlrd teńge kólemindegi nesıe tóleminiń merzimi uzartyldy. «Qazaqstan Respýblıkasyndaǵy bankter jáne bank qyzmeti týraly» zańnyń 34-babyna sáıkes, merzimdi áskerı qyzmetke shaqyrylǵan azamattardyń áskerı qyzmette júrgen ýaqytynda aqshalaı nemese materıaldyq nesıeleri toqtatylyp otyrady. Áskerı qyzmetke shaqyrylǵan azamattar tólem ýaqytynyń ótip ketýine nemese ósimpuldardyń ósýine alańdamaıdy. Bul ekinshi deńgeıli bankterdiń paıdasyn ýaqytsha toqtatady. Soǵan qaramastan mundaı sharalar azamattarǵa múmkindik berýge baǵyttalǵan, - dedi Albert Bekmuhanov.
Buryn Qorǵanys mınıstrligi men qarjy uıymdarynyń arasynda memorandým bolǵan edi. Ol kezde jergilikti áskerı basqarý organdary nemese shaqyrý komıssııalary bankterge arnaıy tizim joldap otyratyn. Qazir zańǵa engizilgen ózgeristerden keıin bul protsess tolyq avtomattandyrylǵan.
– Jergilikti áskerı basqarý organdary áskerı qyzmetke shaqyrylatyn azamattardy «Integraldy shlıýz» júıesine engizedi. Aqparat engizilgen sátte ol ekinshi deńgeıli bankter men basqa da kommertsııalyq uıymdarǵa birden túsedi. Osy arqyly kredıttik kanıkýl avtomatty túrde 14 aıǵa keıinge qaldyrylady. Sondyqtan ata-analarǵa eshqaıda baryp, ótinish jazýdyń qajeti joq, - dedi spıker.
Sonymen qatar Qorǵanys mınıstrligi áskerı qyzmetin ótep júrgen azamattarǵa jańa nesıe rásimdeýge de shekteý engizgen.
– «Qazaqstan Respýblıkasyndaǵy bankter jáne bank qyzmeti týraly» zańǵa merzimdi áskerı qyzmetin ótep júrgen azamattarǵa nesıe berýge tyıym salý týraly ózgerister engizildi. ıAǵnı áskerı qyzmettegi azamattarǵa kredıttik kanıkýl berýmen qatar, qyzmet ótip júrgen ýaqytta jańa nesıe alýǵa da tyıym salynady. Bul ózgerister 2025 jylǵy 16 shildede engizilip, 16 qyrkúıekten bastap kúshine endi, — dedi Albert Bekmuhanov.
Kredıttik kanıkýldyń qalaı jumys isteıtinin merzimdi áskerı qyzmetshi Arnur Bekbaev ta aıtyp berdi. 54380 áskerı bóliminiń sarbazy Kazinform tilshisine bergen suhbatynda áskerge attanar aldynda 1 mıllıon teńgeden astam nesıesi bolǵanyn jetkizdi.
– Men áskerge Taldyqorǵan qalasynan shaqyryldym. Áskerge óz erkimmen, boryshymdy óteýge attandym. Áskerge ketpes buryn 1 mıllıon teńgeden astam nesıem boldy. Ony ata-anama úı qurylysyna kómektesý úshin alǵan edim. Áskerge ketsem, ony qalaı tóleımin dep ýaıymdadym. Biraq áskerı basqarý organdarynyń kómekteri bar eken. Olar merzimdi áskerı qyzmetke attanǵan azamattyń nesıesin 14 aıǵa shegeredi eken. Bastapqyda buǵan senbedim. Biraq áskerı bólimge kelgen soń menen tolyq málimetterimdi alyp, telefonyma nesıemniń toqtaǵany týraly habarlama kelgende, ústimnen aýyr júk túskendeı qýandym. Qazir áskerı qyzmetimniń 6 aıyn ótkerdim. Taǵy 8 aıdan keıin nesıemdi tóleýdi qaıta jalǵastyramyn, - dedi sarbaz.
Aıta keteıik, Atyraýda 400-den astam azamat áskerı qyzmetten jaltaryp júr.
