Bıyl ardagerlerge 8,5 mlrd teńge járdemaqy tólendi

ASTANA. KAZINFORM — 2025 jyly atalǵan sanattardaǵy azamattarǵa 8,5 mlrd teńge somasynda arnaýly memlekettik járdemaqy tólendi. 2025 jyly osy maqsattarǵa 17 mlrd teńge qarastyrylǵan. Bul týraly Eńbek jáne halyqty áleýmettik qorǵaý mınıstrligi málim etti.  

Vedomstvonyń dereginshe, 2025 jylǵy 1 shildedegi jaǵdaı boıynsha Qazaqstanda 80 932 ardager turady, onyń ishinde Uly Otan soǵysynyń (budan ári — UOS) 96 ardageri, jeńildikter boıynsha UOS ardagerlerine teńestirilgen 16 630 ardager, 26 580 basqa memleketterdiń aýmaǵynda urys qımyldarynyń ardagerleri, 37 626 UOS jyldaryndaǵy tyl eńbekkerleri. 

Respýblıkalyq bıýdjetten beriletin aı saıynǵy arnaýly memlekettik járdemaqy ardagerlerdiń barlyq sanattaryna, ózge de áleýmettik tólemderdi alýyna qaramastan, mynadaı mólsherde tólenedi:

1) UOS ardagerleri — 16 AEK (2025 jyly — 62 912 teńge);

2) jeńildikteri boıynsha UOS ardagerlerine teńestirilgen ardagerler, olardyń ishinde:

— UOS kezeńinde jaraqat alýy, kontýzııa alýy, mertigýi nemese aýrý saldarynan múgedektigi bar adamdarǵa jeńildikter boıynsha teńestirilgen adamdar — 7,55 AEK (2025 jyly — 29 687 teńge);

— jeńildikter boıynsha UOS qatysýshylaryna teńestirilgen tulǵalar — 6,19 AEK (2025 jyly — 24 339 teńge);

3) basqa memleketterdiń aýmaǵyndaǵy urys qımyldarynyń ardagerleri, onyń ishinde:

— Aýǵanstandaǵy urys qımyldaryna qatysýshylar — 6,19 AEK (2025 jyly — 24 339 teńge);

— Tájik-Aýǵan ýchaskesinde TMD shekarasyn qorǵaýdy kúsheıtý jónindegi mindetterdi oryndaǵan, Iraktaǵy halyqaralyq bitimgershilik operatsııaǵa, Taýly Qarabaqtaǵy etnosaralyq qaqtyǵysty retteýge qatysqan áskerı qyzmetshiler — 4,8 AEK (2025 jyly — 18 874 teńge);

4) UOS jyldaryndaǵy tyl eńbekkerleri — 2,13 AEK (2025 jyly — 8 376 teńge).

Al soǵys ardagerleri men tyl eńbekkerleri qansha zeınetaqy alatynyn bilgińiz kelse myna siltemege ótińiz.