Bıyl ÁMSQ bıznes-protsesterin avtomattandyrý jumystary aıaqtalýy tıis - Bektenov
ASTANA. KAZINFORM — Áleýmettik medıtsınalyq saqtandyrý qorynyń bıznes-protsesterin jańǵyrtý baıaý júrip jatyr. Bul týraly Úkimet otyrysynda Premer-mınıstr Oljas Bektenov aıtty.
- Búginde Áleýmettik medıtsınalyq saqtandyrý qory densaýlyq saqtaý júıesiniń negizgi býyny sanalady. Biraq qordyń bıznes-protsesterin jańǵyrtý baıaý júrip jatyr. Ásirese josparlaý, tólem júrgizý jáne satyp alý bóliginde uzaqqa sozylyp ketti. Sondyqtan qor jumysty barynsha jandandyrýy qajet. Medıtsınalyq kómekti qoljetimdi, turaqty ári azamattardyń talaptaryna saı etý úshin densaýlyq saqtaý júıesinde úılesimdi jáne shuǵyl sharalar qabyldanýǵa tıis, - dedi Úkimet basshysy.
Osyǵan oraı Premer-mınıstr birqatar mınıstrlik pen óńir ákimdikterine naqty tapsyrmalar berdi. Atap aıtqanda, eń aldymen Densaýlyq saqtaý mınıstrligi Áleýmettik medıtsınalyq saqtandyrý qorymen birlesip, osy jyldyń sońyna deıin qordyń bıznes-protsesterin avtomattandyrý men ońtaılandyrý jumystaryn aıaqtaýy tıis. Sondaı-aq azamattar men medıtsınalyq uıymdar úshin yńǵaıly servısterdi engize otyryp, tsıfrlyq platformany tolyqtaı qaıta qaraǵany jón.
- Ekinshiden, Densaýlyq saqtaý mınıstrligi Mádenıet jáne aqparat mınıstrligimen birlesip, bıyl 1 jeltoqsanǵa deıin medıtsınalyq saqtandyrýdyń jańa normalaryn aqparattyq-túsindirý boıynsha jumys josparyn ázirlep, iske asyrsyn. Buqaralyq aqparat quraldaryn, tsıfrlyq alańdardy, áleýmettik jelilerdi, óńirlik is-sharalardy barynsha paıdalanǵan jón. Úshinshiden, óńir ákimdikteri men Densaýlyq saqtaý mınıstrligi medıtsınalyq kómek sapasyn arttyrý boıynsha pármendi sharalar qabyldap, saqtandyrý júıesine jarna tóleýge qatysty mindettemelerdiń oryndalýyn qamtamasyz etýi qajet. Jergilikti deńgeıde engizilip jatqan ózgeristerdi iske asyrýǵa ákimdikterdi barynsha jumyldyrý kerek, - dedi Oljas Bektenov.
Aıta keteıik, 2026 jyly elektrondy densaýlyq pasporttary azamattarǵa tolyqqandy qoljetimdi bolady.