Bıyl altynnyń quny 70 paıyzǵa jýyq ósti, sebebi nede
ASTANA. KAZINFORM – Álemdik naryqta altyn baǵasy kezekti tarıhı rekordty jańartyp, bir ýntsııasy 4400 dollardan asty. Bul týraly VVS-diń bıznes sholýshysy habarlaıdy.
Sarapshylardyń aıtýynsha, altyn baǵasynyń ósýine AQSh-tyń Federaldy rezerv júıesi keler jyly bazalyq mólsherlemelerdi tómendetýdi jalǵastyrady degen kútim áser etip otyr. Jyl basynda altynnyń bir ýntsııasy shamamen 2600 dollar turǵan.
Importtyq baj salyǵyn engizý jónindegi Donald Tramptyń saıasaty jáne paıyzdyq mólsherlemelerdiń tómendeýi týraly boljamdar ınvestorlardy qaýipsiz aktıvterge, sonyń ishinde altyn men basqa da baǵaly metaldarǵa kóshýge ıtermeledi.
Nátıjesinde 2025 jyldyń basynan beri altyn baǵasy 68 paıyzǵa ósken. BullionVault saýda alańynyń taldaý bóliminiń basshysy Adrıan Eshtiń aıtýynsha, bul – 1979 jyldan bergi eń jyldam jyldyq ósim.
Dúısenbi kúni basqa da baǵaly metaldardyń baǵasy ósti. Kúmistiń bir ýntsııasy 69,44 dollarǵa jetip, ol da tarıhı rekord ornatty. Eshtiń pikirinshe, altyn baǵasyn jyl boıy paıyzdyq mólsherlemeler, soǵystar men saýda qatynastaryna baılanysty «baıaý, biraq turaqty úrdister» joǵary ıtermelegen.
– Baǵaly metaldar naryǵy Tramp belgili bir úderisti iske qosty degen belgi berip otyr, sonyń saldarynan altyn baǵasy kúrt ósti. Saýda soǵystary, Federaldy rezervke qysym, geosaıası shıelenis – munyń bári osy faktorlarmen baılanysty, – dedi ol.
Dúısenbi kúni altyn baǵasy 4400 dollar mejesinen ótip, 4426,66 dollarǵa deıin kóterildi. Investorlar ortalyq bankter mólsherlemeni tómendetse, oblıgatsııalar sekildi qarjy quraldarynyń kiristiligi de azaıady dep esepteıdi. Sondyqtan olar portfelderin ártaraptandyryp, altyn men kúmis sııaqty aktıvterge qarjy salýǵa umtylady.
Sarapshylar arasynda 2026 jyly AQSh-ta paıyzdyq mólsherleme eki ret tómendeıdi degen ortaq boljam qalyptasqan. Altynǵa degen suranysty álemniń túrli elderindegi ortalyq bankter de arttyryp otyr. Olar bul metaldy ekonomıkalyq týrbýlenttilikten saqtaný, AQSh dollaryna táýeldilikti azaıtý jáne rezervterin ártaraptandyrý úshin satyp alýda. Bul týraly Goldman Sachs taldamalyq esebinde aıtylǵan.
Ribble Wealth Management kompanııasynyń sarapshysy Anıta Raıt altyn baǵasynyń jyl boıǵy turaqty ósýin ınvestorlardyń ony ınflıatsııa men ekonomıkalyq belgisizdikke qarsy qorǵanysh quraly retinde qarastyrýymen baılanystyrady.
– Qarjy aktıvteri men saıası turaqtylyqqa degen senim azaıǵanda, ádette eń aldymen altyn reaktsııa bildiredi. Ol – negizgi qarjylyq metall, – dedi ol.
Altyn baǵasyna AQSh dollarynyń álsireýi de yqpal etýde. Al basqa baǵaly metaldar tipti jyldamyraq qymbattady. Máselen, kúmis sońǵy bir jylda 138 paıyzǵa ósti, al platına 17 jyl burynǵy rekordty jańartty. Altynnan aıyrmashylyǵy, ózge baǵaly metaldar ónerkásipte de keńinen qoldanylatyndyqtan, bul suranysqa qosymsha áser etedi.
Dúısenbi kúni munaı baǵasy da ósti. Ótken aptada Donald Tramp AQSh sanktsııa salǵan Venesýelaǵa qatynaıtyn tankerlerge qatysty teńiz blokadasyn engizgen edi. Sonyń aıasynda Brent markaly munaı barreline 1,31 dollarǵa qymbattap, 61,78 dollarǵa jetti.
Al AQSh-ta óndiriletin munaı 1,25 dollarǵa ósip, barreline 57,77 dollar boldy. Degenmen bul baǵa 2025 jyldyń basyndaǵy deńgeıden áli de tómen.