Bıyl Almatydaǵy 12 lagerdiń tórteýi ǵana jumys isteıdi
ALMATY. KAZINFORM – Bıyl Almaty qalasynda 3 000-ǵa jýyq bala jazǵy demalysyn lagerde ótkizedi. Negizgi basymdyq kópbalaly jáne turmysy nashar otbasyndaǵy jetkinshekterge beriledi.
«Órnek» lageriniń ádiskeri Aqsuńqar Arysbaıdyń sózinshe, qala syrtyndaǵy demalys ornynyń ereksheligi kóp. Jaz mezgilinde munda balalar úshin ǵylymı-tehnıkalyq, sporttyq, ekologııalyq-bıologııalyq, týrısttik-ólketaný jáne kórkem-estetıkalyq baǵyttar boıynsha sheberlik sabaqtar men kópshilik is-sharalar uıymdastyrylady.
«Osy jyly bizdiń lagerde balalar demalyp qana qoımaıdy, sonymen qatar bilim de alady. Bıologııa, neırotehnologııany meńgeredi. Kishkentaı demalýshylar óz zymyrandaryn qurastyryp, juldyzdar men kúndi zertteıdi», - deıdi lager ádiskeri.
Qazir munda jetim balalarǵa arnalǵan «Januıa» mamandandyrylǵan kesheniniń 4 pen 18 jas aralyǵyndaǵy 88 tárbıelenýshi demalyp jatyr.
Aıta keteıik, balalardyń demalys maýsymy bastalmas buryn Almaty qalasy Qoǵamdyq keńesiniń músheleri qala lagerlerinde monıtorıng júrgizdi.
«Bıyl jazǵy lagerlerde baqylaý kúsheıtildi. Birinshi kezekte, balalardyń qaýipsizdigi nazarǵa alyndy. Basqa formatqa kóshtik. ıAǵnı, № 64-qaýlyny qoldandyq. Talapqa saı kelmeıtin saýyqtyrý oryndarynyń jumys isteýine ruqsat berilgen joq. Osylaısha, 12 lagerdiń tek 4-in ǵana qabyldadyq», - deıdi Almaty qalasy qoǵamdyq keńesiniń múshesi.
Jalpy osy maýsymda Almatyda 3 myńnan astam balany jazǵy demalyspen qamtý kózdelgen.
