Bıyl Almatyda iri saýda bazarlary jańartylady
ALMATY. KAZINFORM – Bıyl eldegi bazarlardy jańǵyrtýǵa arnalǵan Jol kartasy aıasynda Almatydaǵy 10 bazar modernızatsııadan ótedi.

Saýda jáne ıntegratsııa mınıstrilginen málim etkendeı, Saýda komıtetiniń tóraǵasy Aıdar Ádilbekov Almaty qalasynda ornalasqan 4 bazardyń aldaǵy jańǵyrtý jumystaryna daıyndyǵyn kórip qaıtty.
Mınıstrliktiń Jol kartasyna saı Almatydaǵy «Arlan», «Batyr», «Tulpar, «Arystan», «Jibek Joly», «Azııa», «Taý samaly», «Bereke», «Saýda kent» jáne «Saryarqa» bazarlarynda jańǵyrtý jumystary júrgiziledi. Bazar ıeleri bul jumystardy 2025 jyldyń jeltoqsanyna deıin aıaqtaýy kerek.

– Bazarlardy jańǵyrtý – bul tek qana bıznes ókilderine jaǵdaı jasaý emes, satyp alýshylar úshin qolaıly orta qurý. Degenmen jergilikti ákimdikte qurylys qujattaryna kelisim berý ádette sozylyp ketedi. Bazar ıeleri kóp jaǵdaıda osy boıynsha shaǵymdanady. Eskız, jumys jobasy sııaqty qujattardyń kelisilýi uzaq ýaqyt alatynyn kúndelikti ómirde de kórip júrmiz. Bazarlardy jańǵyrtý jumystary ýaqyty aıaqtalýy úshin jergilikti ákimdikterdi kásipkerlermen der kezinde birlese jumys isteýge shaqyramyz, – dedi Aıdar Ábildabekov.
Almatyda qazir 38 saýda bazary bar. Onyń tórteýi arnaıy bazar bolsa, qalǵan 34-i ámbebap. Saýda zańnamasyna saı saýda bazarlary óz aýmaǵynda kólik turaǵymen qamtylǵan, saýda oryndary sanıtarlyq jáne órt qaýipsizdik talaptaryna saı, onlaın tólem júrgizý múmkindigi bolýy shart.

Aıta keteıik, 2025 jyldyń sońyna deıin jańǵyrtý jumystary júrgizilmegen bazar ıeleri keler jyldyń basynan bastap ákimshilik jaýapkershilikke tartylady.
Eske salaıyq, buǵan deıin Aıdar Ábildabekov 2025 jyly eldegi 99 bazar jańǵyrtylatynyn aıtqan bolatyn.