Bıyl Almatyda qańǵybas janýarlardy aýlaýǵa 580 mln teńge bólindi
ALMATY. KAZINFORM – Byltyr Almaty qalasynyń veterınarlyq qyzmeti 6400 ıt pen 120 mysyqty ustaǵan.
Almaty qalasy Kásipkerlik jáne ınvestıtsııalar basqarmasyna qarasty Almaty veterınarlyq qyzmeti Kazinform agenttiginiń saýalyna jaýap berip, qańǵybas janýarlardy aýlaý jáne ustaý jumysy qalaı júretinin túsindirdi.
Mekeme málimetinshe, megapolıste adamdar men janýarlarǵa ortaq asa qaýipti juqpaly aýrýlardyń taralýyn, sondaı-aq adamdarǵa, eń aldymen balalarǵa qaýipti ıtterdiń shabýylyn boldyrmaý maqsatynda qaraýsyz jáne qańǵybas janýarlardyń sanyn retteý boıynsha júıeli túrde aýlaý jumystary júrgiziledi.
2024 jyly Almaty qalasynda 6 400 ıt jáne 120 mysyq ustalǵan. Onyń ishinde 2 847 ıt jáne 120 mysyq vaktsınatsııalanyp, sterılızatsııa protsedýrasynan ótti.
Byltyr bul jumystarǵa 429 mıllıon teńge bólinse, bıyl qańǵybas jáne qaraýsyz qalǵan janýarlardy aýlaý, ýaqytsha ustaý jáne jansyzdandyrý úshin jergilikti bıýdjetten 580 mln teńge bólindi.
- Aýlanǵan janýarlar ýaqytsha ustaý pýnktine ornalastyrylyp «Janýarlarǵa jaýapkershilikpen qaraý týraly» zańnyń aıasynda ıesi joq ekeni dáleldengen ıtter 5 kún aralaǵynda ýaqytsha ustaý pýnktinde ustalyp, kınolog mamannyń janýardyń qaýiptiligin anyqtaý tekserisinen keıin jansyzdandyrylady nemese ASVB (aýlaý-sterılızatsııalaý-vaktsınatsııalaý-bosatý) baǵlarlamasyna saı ózderiniń mekendegen jerlerine jiberiledi. Sonymen qatar qala turǵyndary ıt alýǵa nıettelgen jaǵdaıda, adoptsııa sharty arqyly jańa ıesine beriledi, - delingen veterınarlyq qyzmet jaýabynda.
Resmı málimetke sáıkes, Almaty qalasynda ustalǵan qaraýsyz ıtterdi ornalastyrýǵa arnalǵan bir ǵana ýaqytsha ustaý pýnkti bar. Atap aıtqanda, pýnkt Túrksib aýdany, Spasskaıa 150/1 mekenjaıynda ornalasqan. Onda ustalǵan janýarlardy qabyldaý jáne tirkeýdi veterınarııalyq maman júzege asyrady. Ýaqytsha ustaý pýnktine kelip túsken qańǵybas ıtter klınıkalyq tekserýden, dıagnostıkalyq jáne kınologııalyq testileýden ótedi. Qańǵybas janýardy sterılızatsııalaý týraly sheshim tórtinshi kúni qabyldanady. Janýarlarǵa operatsııa jasalǵan kúnnen bastap urǵashy ıtter 10 kún, erkek ıtter 3 kúnnen keıin operatsııa orny jazylǵan soń burynǵy meken etken ornyna jiberiledi.
Veterınarııalyq pasportty qalaı alýǵa bolady
Kazinform tilshisi Almaty qalasynyń Kásipkerlik jáne ınvestıtsııalar basqarmasynan úı janýarynyń basty qujaty - veterınarııalyq pasportty qalaı alýǵa bolatynyn jáne qandaı janýarlarǵa beriletinin surady.
Basqarma jaýabyna sáıkes, veterınarııalyq pasport aýyl sharýashyǵynda paıdalanylatyn janýarlarǵa (iri qara mal, usaq múıizdi mal, jylqy, túıe jáne t.b.) jáne úı janýarlaryna (ıt, mysyq, qus jáne t.b.) beriledi.
- Almaty qalasynyń turǵyndary úı janýarlaryna veterınarııalyq pasportty, em-sharalar júrgizetin jeke veterınarııalyq klınıkalardan alady. Almaty aýmaǵynda 2023 jyly 64 bas, 2024 jyly 36 bas úı janýaryna veterınarııalyq pasport berildi, - dep habarlady basqarmadan.
Eske salaıyq, buǵan deıin Qaraǵandy oblysynda lımfangıt dertinen jylqylar qyrylyp jatqanyn jazǵanbyz.