Bıyl Almatyda 30 seısmıkalyq stantsııa ornatylady

ALMATY. KAZINFORM – Almatyda seısmıkalyq qaýiptiń aldyn alý maqsatynda 28 seısmıkalyq stantsııa jumys istep tur.

Almaty ákimi Erbolat Dosaev Qytaıǵa resmı sapary barysynda QHR Jer silkinisteri agenttiginiń prezıdenti Van Kýnmen kezdesti.

– Qazaqstan aýmaǵynyń 40%-dan astamy jer silkinisi qaýpi bar aımaqta ornalasqan. Biz Eýrazııadaǵy seısmıkalyq beldeýler júıesine kiremiz. Al Almatynyń ózi seısmıkalyq belsendi aımaqta ornalasqan. Sondyqtan «Almaty qalasyn 2025 jylǵa deıin damytý jáne 2030 jylǵa deıingi orta merzimdi perspektıvalary» baǵdarlamasynda seısmıkalyq qaýipsizdikti qamtamasyz etý negizgi basymdyqtyń biri, – dedi Erbolat Dosaev.

Onyń aıtýynsha, Almatyda kúshti jer silkinisterin boljaý jáne erte habarlaý úshin 28 stantsııa jumys isteıdi, qosymsha 70 stantsııa ornatý josparlanǵan. Bıyl 30 stantsııa ornatylsa, 2026 jyldyń sońyna deıin taǵy 40 stantsııa iske qosylady.

Almaty ákimdiginen atap ótkendeı, kezdesý qorytyndysy boıynsha Qazaqstannyń seısmologııalyq baıqaý jáne zertteýler ulttyq ǵylymı ortalyǵy men Qytaıdyń jer silkinisteri agenttiginiń geofızıka ınstıtýty arasynda seısmıkalyq monıtorıng jáne erte habarlaý júıelerin biriktirý boıynsha birlesken jumys týraly kelisimge qol qoıyldy.

Bul qujat eki el mamandaryna seısmıkalyq aqparatpen naqty ýaqyt rejıminde almasýǵa múmkindik beredi.

Osyǵan deıin Almatyda jer silkinisine arnalǵan sımýlıatsııalyq oqý ortalyǵy ashylatyny týraly jazǵan edik.

Aıta keteıik, Almatydaǵy 5600 ǵımarat jer silkinisine tózimsiz.