Bıyl Almaty oblysynda 61 myń jańa jumys orny ashylady
QONAEV. KAZINFORM – Almaty oblysynda bir aptada 995 jańa jumys orny ashyldy.
Óńir ákimdiginen málim etkendeı, eń kóp jumys orny bilim berý salasynda. 112 muǵalim men tárbıeshi mektepter men balabaqshalarǵa jumysqa qabyldandy. Jańa mamandardyń basym bóligi Qarǵaly aýylyndaǵy №1 mektep-lıtseıge, Raıymbek aýdanyndaǵy balalar-jasóspirimder sport mektebine jáne A. Beıseýov atyndaǵy orta mektepke ornalasty.
Densaýlyq saqtaý salasy da jańa kadrlarmen tolyqty. Almaty oblystyq balalar klınıkalyq aýrýhanasy men arnaıy áleýmettik qyzmet kórsetý ortalyǵyna 45 medıtsınalyq maman jumysqa alyndy.Budan bólek, kólik jáne qoıma sharýashylyǵy salasyna – 65 adam, ónerkásipke – 24 adam,balyq sharýashylyǵyna – 15 adam, qurylysqa – 10 adam jumysqa ornalasty.
Jańadan ashylǵan 995 jumys ornynyń 567-si sýbsıdııalanǵan, al 428 bos jumys orny enbek.kz portalyna jarııalandy.
Jumyspen qamtý jáne áleýmettik baǵdarlamalar basqarmasynyń basshysy Aıgúl Ahmetova bul baǵytta jumystyń jalǵasatynyn jetikzdi.
– Jańa jumys oryndaryn ashý – bizdiń basty mindetimiz. Biz jumys berýshilermen tyǵyz baılanystamyz, jumys izdeýshilerge qolaıly bos oryndardy tańdaýǵa kómektesemiz. Árbir azamattyń turaqty jumyspen qamtylyp, otbasyn asyraýǵa múmkindigi bolýy mańyzdy,– dedi ol.
2025 jyly Almaty oblysynda 61,2 myń jańa jumys ornyn ashý josparlanyp otyr.
Osyǵan deıin 2025 jyly Qazaqstanda qandaı mamandyqtarǵa suranys joǵary bolatyny týraly jazǵan edik.
Eńbek resýrstaryn damytý ortalyǵynyń málimetinshe, 2025–2030 jyldary elimizde túrli salada 1,6 mln maman qajet bolady. Onyń ishine joǵary, orta, arnaıy bilimi bar mamandar, basshylar jáne arnaıy biliktiligi joq jumysshylar enedi.