Bıyl Almaty qalasynyń Eńbek mobıldiligi ortalyǵyna 43 060 áıel júgingen
ALMATY.KAZINFORM - Almaty otbasylyq-turmystyq zorlyq-zombylyqtyń aldyn alyp, áıelder men balalardyń quqyǵyn qorǵap, psıhologııalyq jáne quqyqtyq kómekti arttyrýǵa kóńil bóledi.
Almatyda shamamen 1,2 mıllıon áıel turady. Bul qala halqynyń 52%-na teń. Olardyń 613 myńnan astamy eńbek qyzmetimen aınalyssa, 60 myńnan astamy basshylyq laýazymdarda jumys isteıdi. Qalada 38 136 kópbalaly otbasy bar.
Óńirlik kommýnıkatsııalar qyzmetinde qala ákiminiń genderlik teńdik máseleleri jónindegi keńesshisi, qala ákimdigi janyndaǵy Áıelder isteri men otbasylyq-demografııalyq saıasat jónindegi komıssııanyń múshesi Aıgúl Shalbaeva áıelderdi qoldaıtyn qandaı shara jasalǵanyn aıtty.
25 qarasha men 10 jeltoqsan aralyǵynda «Genderlik zorlyq-zombylyqtyń barlyq túrine qarsy 16 kúndik belsendi is-qımyl» halyqaralyq aktsııasy ótedi. Onyń maqsaty – áıelder men qyzdarǵa jasaıtyn qııanattyń aldyn alýǵa qoǵamnyń nazaryn aýdarý, azamattarǵa qorǵaný tetigi týraly aqparat berý.
Spıkerdiń aıtýynsha, profılaktıkalyq jumystyń tıimdiligin arttyrý úshin polıtsııa, densaýlyq saqtaý men bilim berý uıymdary, áleýmettik qyzmet pen úkimettik emes sektor arasyndaǵy yntymaqtastyqty nyǵaıtý qajet.
2026 jyly Almaty qalasynyń Eńbek mobıldiligi ortalyǵyna 43 060 áıel júgingen. Onyń 17 228-i jumyspen qamtý sharalarymen jáne áleýmettik qorǵaý baǵdarlamalarymen qamtylǵan. 9 617 áıel turaqty jumysqa ornalastyrylyp, taǵy 597-si kásibı oqytýǵa jiberilgen.
122 áıel bıznes-ıdeıalaryn júzege asyrý úshin 400 AEK-ke deıingi mólsherde grant alǵan. «Bastaý Bıznes» jobasy aıasynda 1 094 adam oqýdan ótse, Skills Enbek.kz platformasynda 2 152 áıel bilim alǵan.
Aıgúl Shalbaevanyń aıtýynsha, komıssııa jumysynyń nátıjeliligi, eń aldymen, qala turǵyndarynyń ómirindegi ózgeris arqyly baǵalanýy tıis.
- Bizdiń ortaq mindetimiz – ár áıel óz áleýetin júzege asyra alatyn, árbir otbasy memlekettiń qoldaýyn sezinetin, al ár bala qaýipsiz ári qolaıly ortada ósip-jetiletin jaǵdaı qalyptastyrý, – dedi Shalbaeva.
Eske salsaq, elimizdegi ǵylymı qyzmetkerlerdiń 56%-y áıelder ekeni aıtylǵan edi.