Bıyl alǵashqy jartyjyldyqta el ekonomıkasy 4,1% ósti
ASTANA.KAZINFORM – Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın el ekonomıkasynda oń dınamıka baıqalatynyn málimdedi.
– Bıyl qańtar-maýsymnyń qorytyndysy boıynsha ekonomıkanyń ósýi 4,1%-ǵa jetip, qańtar-mamyrmen salystyrǵanda 0,4 paıyzdyq tarmaqqa jedeldedi. Oń dınamıka naqty sektordaǵy ósý qarqynynyń osy jylǵy qańtar-mamyrdaǵy 4%-dan 5,1%-ǵa deıin ulǵaıýy esebinen qamtamasyz etildi. Qyzmet kórsetý salasynda da turaqty ósý saqtalyp otyr – qyzmetter kólemi 3,5%-ǵa ulǵaıdy. Ekonomıka ósýiniń negizgi draıveri munaıǵa qatysty emes sektor bolyp qala beredi. Osy jyly munaıǵa qatysty emes sektordyń ósý qarqyny turaqty túrde 5%-dan asýda. Salalar arasynda eń joǵary ósýdi qurylys, óńdeý ónerkásibi, kólik qyzmetteri jáne saýda kórsetýde. Osy salalardyń jalpy ishki ónimniń ósýine qosqan jıyntyq úlesi shamamen 85%-dy quraıdy. Oń dınamıka aýyl sharýashylyǵy men baılanys qyzmetterinde de saqtalyp otyr, – dedi ol.
Aıta keteıik, buǵan deıin jahandyq turaqsyzdyqqa qaramastan Qazaqstan ekonomıkasy ósimin saqtaıtynyn jazǵanbyz.
