Bıyl alǵash ret Muǵalimder kúni merekesi 5 qazanda atalyp ótedi

Bıyl alǵash ret Muǵalimder kúni merekesi 5 qazanǵa bekitildi. Esterińizge sala keteıik, tıisti qaýlyny QR Úkimeti qabyldaǵan bolatyn, dep habarlaıdy QazAqparat QR Oqý-aǵartý mınıstrliginiń baspasóz qyzmetine silteme jasap.

Osylaısha dúnıedegi eń asyl, jaýapty ári mańyzdy mamandyq ókilderin biriktiretin bul mereke - Dúnıejúzilik muǵalimder kúnimen sáıkestendirildi.

Bul kúni Astanada Respýblıkalyq pedagogter sezi ótedi. Oǵan elimizdiń barlyq óńirinen 700-ge jýyq muǵalim qatysady. Pedagogter arnaıy uıymdastyrylǵan alańdarada ozyq eńbekterimen jáne halyqaralyq tájirıbelermen bólisedi.

Atap óterligi, búgingi tańda elimizdegi bilim berý salasynda mektepke deıingi, orta, tehnıkalyq jáne kásiptik bilim berý baǵytynda 500 myńǵa jýyq pedagog jumys isteıdi.
Memleket basshysynyń bastamasymen 2019 jyly pedagogterdiń mártebesi jeke zańmen bekitildi.

Tórt jyl ishinde mektep muǵalimderiniń jalaqysy eki ese ósti. 220 myńǵa jýyq ustaz taǵaıyndalǵan sanaty úshin 50%-ǵa deıin ústemeaqy alady. Óndiristen tartylǵan tehnıkalyq jáne kásiptik bilim berý pedagogteri jalaqysyna 35%-ǵa deıin qosymsha aqy alady. Bıylǵy jyldyń qyrkúıek aıynan bastap 97 myń tárbıeshiniń jalaqysy taǵy 30%-ǵa kóterildi.

Aıta keteıik, 1994 jyldan beri dúnıe júziniń 100-den astam memleketinde qazan aıynyń alǵashqy jeksenbisi muǵalimder men bilim berý salasyndaǵy qyzmetkerlerdiń kásibı merekesi bolyp belgilengen. Keı memleketter bul merekeni 5 qazan kúni atap ótedi.