Bıyl áleýmettik salada 95 jemqorlyq qylmys tirkelip, 34 adam sottaldy
ASTANA. KAZINFORM – Bıyl áleýmettik salada 95 jemqorlyq qylmys tirkelip, 58 adam áshkerelendi, 34 adam sottaldy. Bul týraly Sybaılas jemqorlyqqa qarsy is-qımyl agenttigi habarlady.
Máselen, Sybaılas jemqorlyqqa qarsy qyzmettiń Mańǵystaý oblysy boıynsha departamenti «№2 Jańaózen qalalyq emhanasy» ShJQ MKK dırektory men bas býhgalterine qatysty sotqa deıingi tergeýdi aıaqtady.
Olar memlekettik satyp alý sharty sheńberinde medıtsınalyq buıymdardy jetkizbesten jeke kompanııanyń shotyna 10,5 mln teńge somasynda aqsha aýdarý arqyly qarajat jymqyrdy degen kúdikke ilindi. Sottyń sanktsııasymen kásiporyn dırektory qamaýǵa alyndy. Qylmystyq-protsestik kodekstiń 201-babyna sáıkes ózge aqparat jarııa etýge jatpaıdy.
Osy jyldyń 26 tamyzynda Atyraý qalasynyń soty №4 Atyraý qalalyq emhanasynyń dırektory E.Sabırovqa, sharýashylyq meńgerýshisi A.Áljanovaǵa, bas býhgalter M. Dúısenǵalıevaǵa jáne kásipker A.Eralıevaǵa qatysty úkim shyǵardy.
Aldyn alý sharalary sheńberinde sot protsesi ashyq rejımde ótkizildi. Protseske onlaın túrde oblystyq Densaýlyq saqtaý basqarmasynyń jáne onyń 28 vedomstvolyq baǵynysty uıymdarynyń qyzmetkerleri qosyldy. Sottalýshylar zańnama talaptaryn buza otyryp jasalǵan sharttar sheńberinde is júzinde qyzmet kórsetýsiz kásipkerge 231,8 mln teńge somasynda aqsha aýdarý jolymen qarajat jymqyrǵany úshin kináli dep tanyldy.
Sot úkimimen olarǵa 5 jyldan 7 jylǵa deıingi merzimge bas bostandyǵynan aıyrý jazasy taǵaıyndaldy. Sondaı-aq, emhana basshysy Sabırov ómir boıy memlekettik qyzmette jáne kvazımemlekettik sektor sýbektilerinde qyzmet atqarý quqyǵynan aıyryldy. Áljanova, Dúısenǵalıeva jáne Eralıeva memlekettik uıymdarda 7 jyl merzimge materıaldyq-jaýapty laýazymdardy atqarý quqyǵynan aıyryldy.
Sot úkimi zańdy kúshine engen joq. Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.
