Bıyl Aqtóbede 24 jańa mektep qoldanysqa beriledi
AQTÓBE. KAZINFORM – Aqtóbe oblysyndaǵy mektepterde oryn tapshylyǵy 19 myńǵa jetti. Bıyl óńirde 24 mektep paıdalanýǵa berilýi tıis.
Aqtóbede «Jaıly mektep» jobasy aıasynda 18 mektep salynady. Onyń 14-i bıyl qoldanysqa beriledi. Oblysta taǵy 10 mekteptiń qurylysy qatar júrip jatyr. Oǵan qarjy jergilikti bıýdjetten bólingen. Oblys ákimi Ashat Shaharov bilim berý oryndary salynyp jatqan qurylys alańynda boldy. Onyń ekeýi — Eset batyr turǵyn alabynda ornalasqan. Munda árqaısysy 2000 oryndyq zamanaýı mektep boı kóterip jatyr. Taǵy bireýi Baýyrlastar-3 turǵyn alabynda ornalasqan 600 oryndyq mektep.
— Mektepterdi ýaqytyly qoldanysqa berý jáne nysandy ınfraqurylymǵa qosýda esh kedergi bolmaýy tıis. Jańa oqý jylynda halyq ıgiligine beremiz dep otyrǵan bilim ordalary birinshi qyrkúıekke daıyn bolýy kerek. Qurylys qarqyndy júrip jatyr. Sol sebepti jumys oryndary qurylady, kadr tapshylyǵy bolmaýy qajet. Eń bastysy — jaqyn mańda turatyn turǵyndar mektep qurylysynyń bitkenin kútip júr. Sony esten shyǵarmaý kerek», — dedi oblys ákim Ashat Shaharov merdigerlerge.
Aıta keteıik, «Jaıly mektep» ulttyq jobasy aıasynda salynyp jatqan 18 mekteptiń tórteýi 2 myń oryndyq. Kóbi halyq tyǵyz ornalasqan shaǵyn aýdandarda ornalasqan. Qurylys jumystaryna barlyǵy 91 mlrd teńgege jýyq qarjy qarastyryldy.
— Aqtóbede 19 myń oryn tapshylyǵy máselesi bar. Salynyp jatqan mektepter úsh aýysymdy mektep máselesin sheshýge septigin tıgizedi, — dedi Aqtóbe oblystyq Bilim basqarmasynyń basshysy Jaıyq Sultan.
