Bıyl Aqtóbede 2 myńnan astam áskerge shaqyrylýshy izdeýde boldy
AQTÓBE. KAZINFORM — Bıyl 2 myńnan astam áskerge shaqyrylýshy komıssııa tekserýine óz erkimen barmady. Polıtsııa basym bóligin tapqanymen, áli de 379 aqtóbelik izdeýde júr.
Aqtóbe oblysynda naýryz-maýsym aılary aralyǵynda 1091 adamdy ásker qataryna shaqyrý josparlandy. Onyń 1053-i shaqyryldy. Óńir qarýly kúshter qataryna shaqyrý josparyn oryndaı almady. Onyń birneshe sebebi aıtyldy.
— Birinshiden, 2025 jylmen salystyrǵanda merzimdi áskerı qyzmetke shaqyrylatyn azamattar sany 60-qa artty. Ekinshiden, áskerı qyzmetten jaltaryp júrgen adamdar sany kóp. Jyl basynan beri 2 120 áskerge shaqyrylýyshy izdeýde boldy. Onyń ishinde 1749-y áskerı komıssııaǵa jetkizildi, al qalǵan 371-i habarlama alsa da shaqyrý bólimderine kelmedi. Úshinshiden, azamattardyń moraldyq-iskerlik qasıetteri tómen. BAQ pen áleýmettik jelilerde áskerı qyzmet týraly burmalanǵan túsinik qalyptasyp, teris aqparat tarady. Tórtinshiden, er balalardyń densaýlyǵy nashar. Medıtsınalyq komıssııalardyń sheshimin qabyldamaı, qosymsha tekserýge de jiberilip jatady, — dedi Aqtóbe oblystyq qorǵanys isteri jónindegi departament bastyǵynyń orynbasary Birjan Baımuhanov.
Áskerı qyzmetten jaltaryp júrgenderdi anyqtap, tabý polıtsııa men jergilikti atqarýshy organǵa júktelgen.
— Aqtóbede Ákimshilik quqyqbuzýshylyq kodekstiń «QR azamattarynyń áskerı esepke alý jónindegi mindetterdi oryndamaýy» baby boıynsha 51 adam, «Medıtsınalyq tekserilý nemese jıyndardan jaltarý» baby boıynsha 31 adam jaýapqa tartyldy. Keıbir aýdandar ákimshilik shara qabyldamaǵan, — dedi Birjan Baımuhanov.
Aqtóbede barlyǵy 14 áskerge shaqyrý jáne medıtsınalyq komıssııasy jumys isteıdi. Oblysta barlyǵy 13 shaqyrý pýnkti bolýy tıis. Alaıda Áıteke bı jáne Yrǵyz aýdandarynda shaqyrý pýnktteri joq. Al Baıǵanın, Temir, Oıyl men Qobdadaǵy shaqyrý bólimderiniń ǵımaraty kúrdeli jóndeýdi qajet etip tur. Sonymen birge Muǵaljar men Qarǵalyda ǵımarattardy jalǵa alyp otyr. Taǵy bir problema — medıtsınalyq komıssııa quramynda kóz dárigeri, hrýrg, psıhıatr men dermatolog tapshy.
— Er balalar arasynda týa bitti aýrý jıi kezdesedi. Máselen, maıtaban. Biraq jeńil dárejede bolsa áskerı qyzmetti óteýge kedergi keltire almaıdy. Eki jyldyq tájirıbeme súıenip aıtar bolsam, áskerıge barýdy qalaıtyn jigitter kóbeıdi. Taǵy bir aıtatyn jaıt, qalaǵa qaraǵanda aýyl balalary shymyr keledi, áskerıge barǵysy keletin dep solar, — dedi hırýrg Bolat Ájmuratov.
Buǵan deıin habarlaǵanymyzdaı, Pavlodardan 700-den astam jas ásker qataryna shaqyrylady.
