Bıyl Aqtóbede 160 myń ga jer memleket menshigine qaıtarylady

AQTÓBE. KAZINFORM – Aýyl sharýashylyǵy maqsatyndaǵy jerdi qaıtarý jumysy jalǵasady. Byltyr 219 myń qaıtaryldy. Bıylǵy meje – 160 myń ga.

Aqtóbede paıdalanylmaı jatqan jerlerdi qaıtarý úshin aldymen tekserý júrgizilip, sharýalarǵa eskertý beriledi. Keıin ǵana kelisimmen jer memleket menshigine ótedi.

Aqtóbe oblysynyń jer qatynastary basqarmasynyń basshysy Nurbol Erjanovtyń aqparatyna súıensek, byltyr 219 063 ga jer qaıtaryldy. Osy arqyly oblystaǵy jaıylym jerlerdiń kólemin keńeıtý josparlanyp otyr. Sebebi mal basy artyp, aýdany 97 myń ga bolatyn jaıylym jetpeıdi. 

- Óńirde 125 joba aıasynda 3 mln ga jerdi qalpyna keltirý jumystary júrgizilip jatyr. Topyraq qunarlylyǵyn arttyrý jónindegi Jol kartasyna sáıkes bıyl Mártók jáne Qobda aýdandarynda 7 myń gektar jerge geobotanıkalyq zertteý júrgizý josparlanǵan, - dedi Nurbol Erjanov. 

Aqtóbe oblysy ákiminiń baspasóz qyzmetiniń habarlaýynsha, byltyr jalpy aýdany 467,7 myń ga bolatyn 376 ýchaske jalǵa berildi. Bul aýyl sharýashylyǵy jáne kommertsııalyq maqsattarǵa arnalǵan ýchaskeler. Bıýdjetke 161,1 mln teńge túsken. 

Eske salsaq, elimizde 30 mln gektar jaıylym tabıǵat áserinen, al 27 mln gektar jer mal taptaǵannan jaramsyz kúıge tústi. 

Azyq-túlik jáne aýyl sharýashylyǵy uıymy, Qazaqstannyń ekologııalyq uıymdary qaýymdastyǵy birlesip, «Agroormanmelıoratsııalaý arqyly Qazaqstanda jaıylymdyq jerlerdiń klımattyq ornyqtylyǵyn qamtamasyz etý» jobasyn usyndy. Jobaǵa Aqtóbe oblysynyń Áıteke bı (Araltoǵaı aýyldyq okrýgi) jáne Muǵaljar (Taldysaı aýyldyq okrýgi) jáne Almaty oblysynyń Balqash aýdanynda tańdaldy. Pılottyq joba 2024-2027 jyldar aralyǵynda iske asyrylady.