Bıyl Aqtóbe oblysynyń ekonomıkasyna 892 mlrd teńge ınvestıtsııa salyndy

ASTANA. KAZINFORM – Aqtóbe oblysynyń ákimi Ashat Shaharov Ortalyq kommýnıkatsııalar qyzmetinde ótken baspasóz konferentsııasynda óńirdiń ınvestıtsııalyq damý kórsetkishteri týraly baıandady.

Ákimniń aıtýynsha, Memleket basshysynyń tapsyrmasyna sáıkes, sheteldik kapıtal tartý jáne ınvestıtsııalyq tartymdylyqty arttyrý baǵytynda júıeli jumystar júrgizilip jatyr.

- Jyl basynan beri Aqtóbe oblysynyń ekonomıkasyna 892 mlrd teńge ınvestıtsııa salynyp, ósim 129%-dy qurady. Bul ótken jyldyń sáıkes kezeńimen salystyrǵanda 217 mlrd teńgege artyq (2024 jyldyń 10 aıy – 674,4 mlrd teńge). Óńirde jyl basynan beri jalpy quny 110 mlrd teńgeden asatyn 8 joba iske qosylǵan. Solardyń biri – ERG kompanııasy júzege asyrǵan, qýaty 150 megavatt bolatyn jel elektr stantsııasy, - dedi Ashat Shaharov.

Sonymen qatar Qazaqstanda alǵash ret «KazFeltec» kompanııasynyń bastamasymen qoı júnin tereń óńdep, qurylys materıaldaryn shyǵaratyn jańa óndiris iske qosyldy.

- Jobanyń ınvestıtsııa kólemi – 5,3 mlrd teńge, jyldyq qýaty – 2,1 myń tonna ónim, - dedi ol.

Sondaı-aq ol óz sózinde jyl sońyna deıin jalpy quny 350 mlrd teńge bolatyn 4 jobany paıdalanýǵa berý josparlanyp otyrǵanyn aıtty. Aldaǵy jyldary karbamıd, bıtým, tsement óndiretin zaýyttar jáne ózge de iri jobalardy iske asyrý kózdelgen.

- Investorlarǵa qolaıly jaǵdaı jasaý úshin Álııa Moldaǵulova atyndaǵy halyqaralyq áýejaı mańynda jalpy aýdany 858 gektar bolatyn «Aqtóbe» arnaıy ekonomıkalyq aımaǵy, sondaı-aq Hromtaý qalasynda aýmaǵy 150 gektar bolatyn respýblıkalyq mańyzy bar «Hromtaý» ındýstrııalyq aımaǵy quryldy, - dep túıindedi ákim.

Buǵan deıin Aqmola oblysyna 660 mlrd teńgeden astam ınvestıtsııa tartylǵanyn jazǵanbyz.