Bıyl Aqtóbe oblysynda 353 mlrd teńgege jýyq ónim óndirilgen

ASTANA. KAZINFORM – Aýyl sharýashylyǵyn jańa deńgeıge kóterý maqsatynda Aqtóbe oblysynda 2025 jyly aýyl sharýashylyǵy salasyn qoldaýǵa 15 mlrd teńge kóleminde qarjy bólindi. Bul týraly Aqtóbe oblysynyń ákimi Ashat Shaharov Ortalyq kommýnıkatsııalar qyzmetinde ótken baspasóz konferentsııasynda habarlady.

Oblys ákiminiń aıtýynsha, memlekettik qoldaýlardyń nátıjesinde aýyl sharýashylyǵy salasynda oń dınamıka saqtalyp otyr. Bıylǵy jyldyń 10 aıynda óńirde jalpy quny 353 mlrd teńgege jýyq ónim óndirilgen. Onyń ishinde mal sharýashylyǵy – 171,8 mlrd teńge, ósimdik sharýashylyǵy – 177,6 mlrd teńge.

- Mal basy byltyrmen salystyrǵanda 7%-ǵa artqan. Atap aıtqanda iri qara – 100,7%, qoı – 105,3%, jylqy – 113,1%, túıe – 108,6%. Sondaı-aq Soltústik Qazaqstan oblysynyń tájirıbesin engizý aıasynda «AIS» sút-taýar fermasyn keńeıtýge 7,5 mlrd teńge kóleminde 2,5 paıyzdyq mólsherlememen jeńildetilgen nesıe berildi. Qazirgi tańda 800 bas iri qara ákelinip, jobanyń birinshi kezeńi iske qosyldy. Jalpy 1 600 bas mal tolyq jetkizilgennen keıin óńirdegi sút óndirisi qosymsha 20 myń tonnaǵa artady dep kútilip otyr. Bul Aqtóbe oblysyn óńdelgen sútpen qamtamasyz etý deńgeıin 62%-dan 90%-ǵa deıin kóterýge múmkindik beredi, - dedi ol.

Sonymen qatar Ashat Shaharov brıfıng barysynda ósimdik sharýashylyǵynda «Keń dala-2» baǵdarlamasy aıasynda kóktemgi egis pen kúzgi oraq jumystaryna 5,9 mlrd teńge kóleminde 5 paıyzben jeńildetilgen nesıe berilgenin atap ótti. Sonyń nátıjesinde bıyl 554 myń tonna ónim jınaldy. Bul byltyrǵy kórsetkishten 40 myń tonnaǵa artyq (2024 jylǵy ónim – 515 myń tonna).

- Aýyl sharýashylyǵyna ınvestıtsııa tartý boıynsha bıyl 11,5 mlrd teńge quraıtyn 6 joba iske asyryldy. Sonymen qatar «Aýyl Amanaty» jobasy aıasynda 16,4 mlrd teńgege 2 883 joba qarjylandyryldy, - dedi Ashat Shaharov.

Buǵan deıin elimizdiń aýyl sharýashylyǵy ónimderi 15-ten asa elge eksporttalady dep jazǵanbyz.